Vana-Võromaa savvusannu kuuntüükogo iistvõtmisõl naas’ keväjädsel käänüpääväl pääle savvusannu kokkolugõminõ. Priitahtligu ülelugõmisõ kampaaniaga om plaanin saia teedüst kõigi savvusannu kotsilõ, miä Eestin omma, ja uuri, määndsen saisun omma savvusannakombõ nii Vanal Võromaal ku muial Eestin.
«Sannalda kombõ ei püsü, tuuperäst olõmi võtnu ette savvusanna kokko lukõ niimuudu, et savvusanna perrerahvas and esi umast sannast teedä,» seletäs sannu ülelugõmist Mooska talo pernaanõ Veeroja Eda. Timä sõnnu perrä om ülelugõminõ lihtsä: «Lugõmisõl saa vanõmb põlvkund, kinkal om inämb tiidmiisi savvusannast, appi võtta latsõ ja latsõlatsõ, kiä mõistva parõmbalõ nutitelefoni tarvita. Ütenkuun saa sanna mano minnä, tetä sannast pilte, kõnõlda sanna saamisõ luku ja juttõ sannan käümisest. Tollõ tiidmisega saa ankeedin vastussõ kirja panda, neo läbi võrgu är saata ja omgi tettü!»
Savvusannu kokkolugõmisõ üts härgütäjä Puksingu Marko seletäs mano, et olnu väega vaia periselt teedä saia, ku pall’o taad kultuuriväärtüst Eestimaa pääl iks alalõ om. «Kiäki tuud parhilla ei tiiä. Esi olõ sannaumanik, käü sannan siin ja sääl, sõida Eestit pite ümbre, näe õks, et Lõunõ-Eestin om rohkõmb ja esieränis tan Võro nukan. A täpset tiidmist ei olõ,» seletäs tä. Nii omgi no kokko säet vastamisleht, kon om sanna kotsilõ umajago küsümüisi. «A nuu omma lühkü ja ei massa pelädä, et puul päivä är lätt: nuu saava õks paari minotiga vastatus,» julgustas Puksingu Marko sannaumanikkõ.
Pelädä ei massa tuud kah, et kõik sanna kohegi avaligult vällä pandas. «Ku inemine ei taha, sis timä sanna avaligu kaardi pääle ei panta. A uurjilõ om teedüs nätä ja noidõ perrä saa kombidõ püsümist hinnada,» seletäs Puksing.
Sannu ülelugõmisõ teedüs kor’atas kokko teedüskokko, midä hoitas Võro instituudin. Ülelugõmisõ kaardijaon tetäs kuuntüüd Maa- ja Ruumiammõtiga. Päält elektroonilidsõ vastamislehe om võimalik küsümüisile vastada ka paprõ pääl vai e-postiga vastussit saatõn.
Savvusannu ülelugõmisõ edimäne jago loodõtas är tetä poolõ aastaga. Päält tuud kaias, kuis lugõminõ om lännü, ja tetäs arvada mõnõl puul viil välätöid. «Päält kümne aasta omma mi kandi sannakombõ olnu UNESCOn. Loodami ülelugõmisõga teedä saia, mis sais meil seo väärtüsligu huunõga om,» ütles Puksingu Marko.
Täpsempä teedüst savvusannu kokkolugõmisõ kotsilõ saa aadrõsi savvusann.ee/loendus/ päält.
UL
Savvusannu kokkolugõmisõ üts härgütäjä Puksingu Marko. Rahmani Jani pilt
