Riidi, 21. urbõkuu pääväl tähüst’ Võro instituut ettekandõpääväga umma 30. sünnüpäivä. Võro Kandlõ kultuurimajja oll’ tõisi küläliisi siän võrokõisi tervütämä tulnu Eesti Vabariigi president Karisõ Alar.
Päiv alost’ Parksepä latsiaia latsi võrokeelidse laulukavaga. Pidopäävä edimädsen jaon saiva sõnna instituudi direktri Padari Ivari, president Karisõ Alar, instituudi tiidüsnõvvukogo päämiis Kama Kaido ja tiidüsnõvvukogo liigõ akadeemik Pajusalu Karl.
Ettekandidõ vahepääl näüdäti kattõ vahtsõt Võro instituudi välläannõt: savvusanna lavvamängu ja jutussidõ kogomikku.
Edesi kõnõli instituudi tegemiisist Otsa Mirja, Saarõ Evar, Jüvä Sullõv, Fastrõ Mariko ja Uguri Kadri. Päävä lõpõti instituudi sõpru ja kuuntüüseldsiliidsi tervitüse. Pidopäävä juhi olli noorõ võrokõsõ Raju Eliisabet ja Saarõ Hipp.
Rahmani Jan
Jutuhuun omma Eesti Vabariigi president Karisõ Alar, Võro instituudi direktri Padari Ivari ja Kandlõ kultuurimaja juht Kelbä Heiki. Rahmani Elo pildi
Savvusanna lavvamängu näütämine. Projekti vidäjä Piiri Helen kesken ja pidopäävä juhi Raju Eliisabet ja Saarõ Hipp viiri pääl.
Parksepä latsiaia latsõ, kiä lauli võrokiilsit laulõ.
Inemise saalin ettekandit kullõman.
