Võhandu maratonist om saanu väega võimsa märk. Tä tuu Võromaalõ kokko tuhandit paadisõitjit ja hulga noid, kiä sõitjit avitasõ ja julgustasõ. Esihindäst om hull mõtõ panda mito tuhat inemist ütel pääväl jõkõ pite 100 kilomiitret sõitma, a aig om näüdänü, et huviliidsi om hulga ja tulõ mugu mano. Poodimehe ja hotellipidäjä rõõmustasõ ja muido uninõ Võromaa olõs nigu pääväs-paaris talvõunõst heränü.
Säändside suuri asju man om tähtsä kõrraldajidõ uskminõ umma ettevõtmistõ ja julgus suurõlt mõtõlda. Mõnikõrd saa-i suurist mõttist asja, a nuu, miä huulmada kõgõlõ är tetäs, omma todavõrra suurõmba elojõvvuga.
Võhandu maratoni elojõvvulidsusõ üts nukakivi om kimmäle ka võrokõisi kuraas ja ummamuudu-olõk. Uhkus tollõ üle, et meil om tan midägi säänest, midä muial maailman ei olõ. Jõudu kõigilõ, kiä julgusõ suurõlt mõtõlda!
Rahmani Jan,
Uma Lehe päätoimõndaja
