Võrokõisi kongressi vanõmbidõ kogo vahtsõnõ päävanõmb om Kuuba Rainer.
2023. aastaga jüripääväl tull’ edimäst kõrda kokko võrokõisi kongress. Kongress tekk kolm otsust: 1) võro kiil om Eesti piirkundlinõ põlinõ kiil, 2) võrokõsõ omma Eesti põlinõ rahvas, 3) Võromaa luudust tulõ hoita ja tan majanda põlitsidõ kombidõ perrä.
Kongressi saadigu valõ hinnäst neläs aastagas esindäma vanõmbidõ kogo, midä juht päävanõmb. Juhtu nii, et Kauksi Ülle ja Kuuba Rainer saiva vanõmbidõ kogo valimiisil ütepall’o helle. Tuuperäst lepüti kokko, et edimädse kats aastakka pidä päävanõmba ammõtit Kauksi Ülle ja tõõsõ kats aastakka Kuuba Rainer.
Katõ tegotsõmisõaasta joosul omma kongressi vanõmbidõ kogo esindäjä kirotanu märgokirju ja saanu kokko riigikogo Lõunõ-Eesti saadigurühmä liikmide, riigikogo esimehe, kaitsõministri ja kaitsõministeeriümi esindäjidega, haridus- ja tiidüsministeeriümi, kultuuriministeeriümi esindäjide ja tõisi tähtside otsustajidõga, et kõnõlda näile võrokõisi huvvõst ja löüdä ütitsit ossi naidõ huvvõ elloviimises.
Ligembät teedüst kongressi otsussidõ ja vanõmbidõ kogo tegemiisi kotsilõ saa lukõ kodolehe vorokongress.ee päält.
UL
16. mahlakuul and’ seenine päävanõmb Kauksi Ülle uma ammõditähe üle siiämaalõ asõpäävanõmba ammõtit pidänü Kuuba Rainerile. Rahmani Jani pilt
