Võrokõnõ TUPI IVAR om tennü mitmõsugumast sporti, a timä päämine ammõt om spordivõistlusi kõrraldaminõ. Viil om tä tunnõt mälumänge vällämärkjä. Timä kõrraldõdu mälumängu omma Võromaal hinnan tuuperäst, et küsümüisile vastamisõs ei pruugi avita faktitiidmiisist, a tulõ pihta saia küsümüsetegijä esimuudu ja põnõvalõ loogikalõ. Ildaaigu nõssi Ivar rambivalgustõ, ku võtt’ ossa mälumängusaatõst ja võitsõ är 17 saadõt.
* * *
Kuis tull’ sul huvi mälumängu vasta?
Huvi om olnu mul joba ammu, latsõst saani. A periselt naksi mängmän käümä viis-kuus suvvõ tagasi ja tuust sündü huvi esi kah mänge vällä märki. Ja paistus, et tulõ vällä külh.
Olõt esi mälumänge kõrraldaja ja Sul omma säändse tsipa esimuudu mängu. Kuis Sa säändse formaadi pääle tullit?
Naksi mängmän käümä Nõmmõ pubimängel ja sääl oll’ sääne küsüjä nigu Alliku Jaan, Pärnust peri miis. Timä käest ma sis küsse, kas ma või kah säänest formaati tarvita. Tä oll’ nõun, a ütel’, et ärku ma timä küsümüisi tarvitagu.
Ollit ildaaigu saatõn «15 küsimust» ja jõudsõt peris häste edesi. Kas kaamõra iin om rassõmb tark olla ku muido?
No tuu kõgõ targõmb miis iks istus koton sohva pääl. A stuudion valgusõ käen ja kaamõra iin om vähä rassõmb tark olla. Tõnõ asi om tuu, et nä võtva katõ pääväga 16 saadõt üles, nii et ku ma olli sääl terve puulpäävä hummogust õdaguni, sai katõssa saadõt tettüs. Ja järgmäne hummok läts’ sammamuudu edesi. Ku mu jaos tull’ 18. saadõ, läts’ aju kiimä ja sinnä tuu läts’…
Kuis pääle saatõn käümist om lännü, kas kuulsusõkuurma om rassõ?
Olõ-i taa viil nii rassõ kah, a näütüses Võrol, kon minno pall’o tundva, tulõ iks poodin vai liina pääl kävven hulga seletämist ette.
Määne om su kogõmuisi perrä Võromaa mälumängurahvas?
Võromaal omma targa inemise. Mitmit võrokõisi om jo inne kah telemälumängen nättü ja näil om häste lännü. Ja õgas nuu, kiä mu mängel käävä, kah ulli olõ-i.
Su päämine tegemine om spordivõistluisi kõrraldaminõ. Mis sullõ tuu man kõgõ inämb miildüs?
Mullõ miildüs, et saa tetä umma asja. Olõ sääne tsipa päästkääntäv ja tõisi kammandamist ei kannata. Ja muidogi miildüs mullõ mõtsan olla.
Miä pand inemist nii kõvva pingutama, nii võistluisil ku kõrraldamisõ man?
No tuu om iks tuu eestläisi muistinõ suuv naabrist parõmb olla.
Midä soovit seos keväjäs Võromaa rahvalõ?
30 suvvõ tagasi ollimi nõun kardokakuuri süümä. A nüüt kisk egäüts tekki hindä pääle. Olnu vaia inämb ütstõsõst arvosaamist ja veidemb vihapidämist.
Küsse Rahmani Jan
Tupi Ivar. Rahmani Jani pilt
