KOMMÕNTAAR • Kuigimuudu, ei saaki täpsele arvo, kuis, trehvsi minevä pühäpäävä Vahtsõliina rahvamajja, kon peeti 20. Kagu-Eesti ja tollõ seen ka 27. Võro maakunna lauluansamblidõ päivä. Tiidmäldä midägi säändside päivi aoluust ja traditsioonist, kulssi kolmõtunnidsõ kontsõrdi är ja sai tsipa aimu noidõ inemiisi pidopääväst, kiä hindasõ mitmõhelülist ansamblilaulu.
Kokko oll’ Vahtsõliina tulnu 18 lauluansamblit. Päämidselt Võro maakunnast, a hulga ülesastjit oll’ Valga puult kah. Põlvast oll’ seokõrd õnnõ üts lauluansambli.
Kontsõrt oll’ kokko säet niimuudu, et egä ülesastja sai ette kanda kats laulu. Kõik juusksõ häste, määnestki niisama pasmist ette es tulõ. Niipia, ku üte lõpõti, olli tõõsõ platsin ja laul läts’ edesi.
Lauluvalikun olli inämbüisi tunnõdu (pop)laulu. Nojah, vast tsipa vanõmbast aost. Asi om vast tollõn, et inämbüs ülesastjit olli tsipa vanõmban iän. Ei olõ midägi imehtä, mõni vast oll’ joba 27. kõrd säändsel laulupääväl ja inemine saa-i midägi tuu vasta, ku tä egä aastak vanõmbas jääs.
Kuigi laulmist oll’ mitund muudu ja ka ansamblidõ tasõ es olõ peris üttemuudu, või ülesastjidõ ütitses umahusõs pitä laululusti. Rõõmu laulmisõst oll’ tunda egän ülesastmisõn. Suurt tsirkust es tetä, päämine oll’ iks laul, kuigi mõnõn ülesastmisõn oll’ rõivil ja tandsul kah tähtsä osa. A nuu trikitämise jäivä kõik hää maitsõ piire sisse.
Päävä kokkosäädjä olli tennü säändse triki, et alostustõ ja lõppu oll’ valit noorõmbit etteastjit, miä avit’ kontsõrdi huugu hoita. Üllätüsesinejäs kutsut nuur laulu- ja telemiis Sarapi Tõnis kõnõl’ küländ pikält, et om Väimäläst peri, ja hoitsõ laulun peris pikki nuutõ kah. Ja päävä lõpõtaja laulukuur Claro oll’ sammamuudu nuuruslist jõudu täüs.
Tsipa jäi kriipmä tuu, et võrokeelitsit laulõ kanti pääväl ette õnnõ kats tükkü. Niisama pall’o oll’ laulõ mõnõn võõran keelen. Arvada tulõ võrokeelitside laulõ tegijil viil kõvva vaiva nätä, et olnu inämb säändsit pop-laulõ, midä lauluansambli hää meelega laulupääväle toonu.
Ku pruuvi päivä kuigimuudu kokko võtta, sis harilikul kullõjal saalin ikäv kül es nakka. Selle, et tego es olõ jo määndsegi võikilaulmisõ, a õks tuusama lusti peräst laulmisõga. Tollõ vasta, et vanõmbidõ inemiisi helü jääs aastidõga nõrgõmbas, avitas vast noorõmbidõ laulma härgütämine. Egäl juhul oll’ ülesastjidõ silmist nätä ja helüst kuulda, et sääne päiv om näide jaos väega tähtsä.
Rahmani Jan
Ansambli Vannamuudu ülesastminõ 20. Kagu-Eesti lauluansamblidõ pääväl Vahtsõliinan. Rahmani Jani pilt
