Sügüsest plaan Võrol ussõ vallalõ tetä programmiirmise oppamisõ kuul kood/Võru. Tego om programmiirmiskooli kood/Jõhvi haroasotusõga, kon andas puutrõharidust suurilõ inemiisile, kiä tahtva oppi, hinnäst tävvendä vai ammõtit vaihta. Nuu, kiä tahtva seost sügüsest kursuisil opma naada, saava viil paar kuud kuuli kandidiiri.
«Opatas, kuis puutrõkuudi kirota. Kiä oppusõ läbi tege, saa hindäle tarvilidsõ tiidmise, et naada tüüle full-stack tarkvaraarõndajana. Tuu tähendäs mõistmist programmiiri veebilehti, mänge ja veebiplatvormõ nättävät puult ja tagatarrõ kah, et panda kokko täüslahenduisi,» kõnõlõs kooli kood/Võru iistvidäjä Piigli Anneli.
Kuuli kandidiirjäl piät olõma vähembält põhiharidus, tä piät olõma vähembält 18-aastanõ ja mõistma inglüse kiilt. «IT-haron om põhilinõ kiil inglüse kiil ja oppaminõ käü kah mi platvormi pääl inglüse keelen,» seletäs kooli iistvidäjä.
Kuigi koolin om võimalik oppi õnnõ puutrõ kaudu, tetäs Võro liina pangamajja koolilõ uma ruumi. «Õks om hää, ku kotusõ pääl käüt ja ettevõtmiisil kah, sis saat tõisiga läbi kävvü ja kontaktõ luvva. Nii opit lisas programmiirmisele miiskunnatüüd ja probleeme lahendamist,» löüd Piigli Anneli.
A mille om mõistlik programmiirmist oppi? «Mi näemi ka traditsiooniliisin valdkundõn, et elo lätt edesi niimuudu, et automatisiirmine lätt kõrrast tähtsämbäs. Esiki kraamja piät mõistma ummi objekte arvutin kirja panda ja lihtsämbägi tüü man om vaia digimõistmist. Nii om vaia ka inemiisi, kiä vahtsit programmõ edendäse.»
Koolin opminõ om massulinõ. Kooli iistvidäjä julgustas noid kah, kiä kõrraga opimassu massa ei jõvva, iks opmisõ pääle märkmä, selle et omma olõman eri võimalusõ opmisõ alostamisõs ja tuu iist masmisõs. Opmisõ iist saa massa perän kooli lõpõtamist ja tüü löüdmist. Piigli Anneli julgustas vanõmbit inemiisi kah opma. «Piirdmist ei olõ. Näütüses kood/Jõhvi perämädse kursusõ kõgõ noorõmb lõpõtaja oll’ 19aastanõ, kõgõ vanõmb 66aastanõ.»
Kuuli sisseastmisõkatsmiisi jaos piät oppi tahtja võtma kolm nädälit aigu, minkast kats nädälit tulõ olla Jõhvin paigapääl ja sis viil nätäl veebi tiil üten lüvvä. Edimädse koolikatsmisõ naksi pääle joba seo nätäl, 21. mahlakuul, a katsmisõ tulõva viil alostusõga 26. lehekuust ja 28. hainakuust kah. Nii et oppi tahtjil om viil paari kuu joosul aigu hindäst teedä anda. Teedüst sisseastmisõ kotsilõ saa internetist kood.tech lehe päält.
A mille otsusti kood/Võru iistvidäjä umma kuuli võro keelen kittä? «Näütämi taaga vällä mõttõviit, et hoiami umma kiilt ja kultuuri. Ku esi seod kiilt vällä ei tuu, sis ei tuu tedä kiäki. Võro kiil käü iks Võro kandiga käsikäen,» om Piigli Anneli kimmäs.
Rahmani Jan
Kood/Võru iistvidäjä Piigli Anneli kooli võrokeelist reklaami näütämän. Rahmani Jani pilt
