Loominguga tegelejide kokkosaaminõ

23. mahlakuul kell 10 saava Suurõ Muna kohvikun kokko Võro maakunna luuja inemise ja ettevõtja, et arota, määndse omma luumisõvaldkunna inemiisi ja ettevõtjidõ tahtmisõ ja tarvidusõ ja kuis tetä kuuntüüd ja vahtsit ettevõtmiisi. Kokkosaamisõ kõrraldasõ Võromaa arõnduskeskus ja Kagu-Eesti ateljeed.

Kiho Toomas näütäs luulõkoko

Aokirä Akadeemiä päätoimõndaja Kiho Toomas näütäs 23. mahlakuul kell 16 Võrol Kreutzwaldi muusõumin umma luulõkoko «Pundinuiad». «Kiho Toomasõ mõistu täüs luulõ om sääne, midä säänestmuudu eetilidsen jõvvun harva trehväs – väega Eesti-köüdüsseline. Saman ka provotsiirväle aktiivnõ, nigu ka tekstele sekundiirjä Lauritsa Piitre kujondus,» sais raamadu tutvustusõn. Autor om lubanu Võro näütämisel vähembält üte uma luulõtusõ ka võro keelen ette kanda.

Luudusraviõdak

23. mahlakuul kell 17 oodõtas inemiisi Võro instituuti arotama luudusravi üle. Egälütel om seon asjan määnegi tiidmine ja arvaminõ: kuis om nohho ravitu, määne hainatsäi tege unitsõs, kuimuudu roosisõna avitasõ. Eichenbaumi Külli tege jutuotsa vallalõ ja kõnõlõs rahva käest kor’atuist tiidmiisist, a sis saa egäüts ummi kogõmuisi kah jaka. Immeruuht ei anda, a lämmind tsäid pakutas kõnõlõmisõ kõrvalõ külh.

UL