2.–11. lehekuul peetäs Vanal Võromaal joba sisseharinuisi Uma Meki keväjäidsi restoraanõ ja kohvikidõ päivi, midä kutsutas Keväjägurmee. Üten tege 12 söögikotust Setomaast Otõmpääni ja nigu varrambagi, täütvä seo kandi parõmba koka taldrigu, pruukõn päämidselt paigapäälist söögikraami.

Inämbüs kohvikit ja restoraanõ – Suur Muna Haanin, Pauline Resto, Kolm. Köök & Deli ja Namm Resto Võrol, Ilma­veere Obinitsan, mõtsarestoraan Ürg Veetka talon, Ööbiku­oru villa Rõugõn ja Ugandi Resto Otõmpääl – pakk kolmõ käügi­ga süümisemõnno, a lisas om seo kümne päävä seen õigõ mito eriettevõtmist. Näütüses kõrraldas Tillu kohvik Põlvan 2. lehekuul üten Käbliku pruulikuaga kuvvõ käügiga õllõ-õdagusöögi ja 10. lehekuul kuts viil kohvikulõ üten imäga. 3. lehekuul uut Seto­maa turismitalo maagilidsõlõ õdagusöögile ja Vahtsõ-­Saalusõ veinitalo õdagu­söögile, miä om köüdet Tauli Anu muusikalidsõ etteastmisõga. Viil nätäl ildamba, 17. lehekuul kõrraldas Lihuniku äri-restoraan Haanin viie käügiga rändämise lehmäliha maailma.

Umast tulõkist tulõ kõigilõ söögipakjilõ vähämbält üüpäiv varramba teedä anda. Täpsembät teedüst söögipakjidõ ja söögi­kaartõ kotsilõ saa veebilehe umamekk.ee/kevadgurmee päält.

UL