Aomassinaga mädäsuuhu
Ma kuuli raadiost, et mi suukraavi tulõ kinni aia ja kuivõndõdu põllu- ni mõtsamaa tagasi vii ala jättä. Sõs saa luudusõh inämb esi liike hindäle elopaiga. Tulõ vällä, et kõik mi edevanõmbidõ talodõ saamisõ aigu maiõ parõmbas tegemine om tett ilma as’anda, ku kõgõlõ lastas nüüd vesi pääle. Eesti rahva kõgõ tähtsämb lugu kõnõlõs Vargamäe rahva võitlusõst suuga. Olõs Tammsaarõ sada aastat tagasi tuud tiidnü, olnu-s vaia kirota, kuimuudu sõs rassõ tüüga panti algus täämbädsele elolõ.
Eesti om soiõ hulga poolõst Euruupah pääle Soomõt tõõsõ kotusõ pääl, a iks om veidü. A 150 aastat tagasi oll’ Eesti üts viimätsit kotussit, kohe raudtii ehitedi. Tuu ehitämisega läbi mõtsu ja soiõ pidi kah nii mõnõki liigi uma elopaiga maaha jätmä. Kas sõs piässi nuu ravvast maapoolitaja kah üles kiskma? Mitte viil mano ehitämä.
Aomassinaga tagasi minnä või, a peris mädäsuuhu olõ-i vaia jõuda.
