Minevä pühäpäävä tähüst Tal’na võro selts pidolidsõlt umma 35. sünnüpäivä. Pidol kullõldi võrokeelitside laulõ kontsõrti, peeti pidopääväkõnnit ja süüdi krõnglit. Nätä sai näputüütsõõri käsitüünäütüst ja kullõlda näütlejä Metsuri Marje ette kantavit luulõtuisi.
Tal’na võro seldsi päämine tegemine om võrokõisi hindätiidmise ja võro keele hoitminõ Tal’nan. Tuujaos käävä kokko lauluansambli Liiso, tiatritsõõr Tungõl, näputüütsõõr Nopõnäpo ja võro keele kirändüslik kohvitarõ.
Tal’na võro selts luudi 1990. aastaga 8. mahlakuu pääväl. Taa 35 aastaga joosul omma seltsi juhatanu Kõo Ants, Eksta Viivi, Nopri Tea ja parhillanõ esinaanõ Müürsepä Külli. «Taa om priitahtlik, missioonitundõst tettäv tüü 25/8, mitte 24/7,» ütel’ Müürsepä Külli uman pidopääväkõnnõn.
Tä lugi üles terve hulga inemiisi täämbädsest seldsi iistsaisusõst, kiä seldsi tegemiisi vidävä. «Kõõ kavvõmb om uman ammõtin püsünü Mõtsalligu Eva lobby-lavva ministrinä. Aktiivnõ ja tubli om olnu kultuuriministri Plumanni Kaja-Riina, haridust edendänü haridus- ja tiidüsministri Soka Olõv, andmõas’andust om kõrran hoitnu IT-ministri Matvere Tiit, paprõmajandusõ iist hoolõn olnu massuministri Liini Helbe, kirändüsministri Orioni Jana ja tõõsõ, kiä juhatusõn omma olnu.»
Pidopäävä puhul olli Tal’na võro seldsi rahvast tervütämä tulnu Võro instituudi direktri Padari Ivari ja riigikogo liigõ Allasõ Anti.
UL
Lauluansambli Liiso seldsi sünnüpääväpidol üles astman. Rahmani Elo pilt
