Mõnistõ ja ka Eesti lõunõpiiri lähkün Karisöödän om armõdu ilusan pargin alasi jaanituld tett. Sääl om olõman tsill’ukõnõ kõlakoda vai laululavakõnõ ja sääl iihn ka tandsupõrmand, aga tuu jäi aolõ jo tükk aigu tagasi jalgu ja aastõid tandsiti pall’a maa pääl. See keväje võtti Mehkamaa kultuuriseltsi inemise mitu aastat pään kiusanu mõttõ jäl üles, et hädäste ollu vaia vahtsõt põrmadut. Tinavaastatsõl jaanipidul tandsitigi vahtsõ põrmadu pääl.

Mõnistõ kandin om õks sääne kommõ ollu, et ku medägi vaia ärä tetä, a raha kostki projektist ega eelarvõst ei saa, pandas esi raha kokku ja tetäs tüü umast vabast aost palgalda ärä.

«Aprilli lõpu poolõ teimi rahvalõ üleskutsõ tandsupõrmadu jaos raha kokku panda ja kuu ao peräst oll’ vajalik summa kuun,» kõnõl’ kultuuriseltsi üts iistvõtja Roobi Katrin. «Firma OneWood tekk’ materjali ostmises sõbraligu pakmisõ ja kolm kohalikku firmad aviti kah materjali ja tüüga. Kümme mi umma Mehkamaa miist tekki tuu tüü ärä, aga kõgõ tähtsämb ja vajaligumb miis kõgõ ta ettevõtmise man oll’ Lindmäe Edgar,» om Katrin asjalikõlõ mehile vääga tänulik. Tä kõnõl’ ka tuud, et laululavakõsõ elektrivärk oll’ niisama hädäste vaia vällä vaheta. Tuu tüü tekk’ ka Edgar üten Tootsi Jürgeniga tasulda ärä. Vajaligu materjali jaos andi raha Rõugõ vald ja üts kohalik ettevõtõ.

Üts vääga huulja ja abivalmis miis om Katrini jutu järgi ka Tammõ Piitre, kiä hoit pargil kõik aig silmä pääl, käve mitu kõrd sääl haina niitmän ja tekk’ piduplatsilõ pinke manu.

Raha annõtajaid oll’ 69 ja et mitma ettevõtte tahtsõ andjaid umalt puult tennädä, sis saije 41 andjat loosiga kingitüse. Oll’ vällä pant egasugust hääd ja ilusat kraami ja pääauhind oll’ puhkusõpakett Mäe-Kolga talu puult.

«Võit uhkõlt üldä, et nii vahtsõ pidupõrmadu ku pidu esi tekki mi, Mehkamaa inemise, kõik üten. Esinejä, söögipakja, latsilõ ja ka suurilõ inemiisile mängõ kõrraldaja olli kõik uma inemise! Nii tüü ku pidu, kõik oll’ umilt umilõ,» oll’ Roobi Katrinil hää miil.

Nõlvaku Kaie

Pall’u nuuri, virku ja vastatulõlikkõ inemiisi: kiä oll’ põrmadumiiskunnan, kiä toimõnd’ jaanipidu kõrdamineki hääs. Hassi Krisi pilt