Tagatarõ lugu
Ma kuuli raadiost, et inemiisile ei miildü, ku valitsus tege otsussit tagatarõh. A tuu olõ-i määnegi vahtsõnõ asi. Eesti Vabariik sündü õkva niimuudu: Vinne võimu iist salahuisi saiva mõnõ mehe tagatarõh kokko, teivä valmis esisaisvusõ alospaprõ ja kõrraldiva tuu ettelugõmisõ.
Katskümmend kuus aastat ildampa juhtu kõik täpipäält sammamuudu. Säksläisi iist var’ol saiva kokko mehe, kedä mi tiiämi ku Tiefi Otto valitsust. Teno noilõ tagatarõ kõnõluisilõ oll’ võimalik vahtsõst vällä hõigada vaba Eesti riik. Nii võisõmi seo aasta pitä riigi 107. sünnüpäivä.
Ma ei tiiä, ku suuri ja tähtsit otsussit täämbä sääl tagatarõh tetäs, a usu, et kõik as’a, millest sääl kõnõldas, olõ-i halva. Vet inämbüs meistki om umal aol tagatarõh valmis tettü.
