Nimel Zirk om Eestin 194 kandjat. Tartu ja mulgi keele muudu nimekujul Sirk om kandjit 146. Täämbädsen kiräviien nimel Tsirk om 39 kandjat. Lisas om viil nimi Sirg 56 kandjaga.
Hingelugõmiisi perrä panti neide nimmi iinkäüjit Zirk, Zirck, Zirgk, Zirg, Sirk, Sirck ja Sirg 35 mõisan. Näist õnnõ üts Sirk oll’ Harju- ja üts Virumaal, ülejäänü olli Tartu-, Villändi- ja Võrumaal, kon sulõlidsõ eläjä tähendüs ‚tsirk‘ om harilik. Võrumaal panti õnnõ z-algusõga nimmi, kon välläütlemine oll’ [ts-], kokku säitsmän mõisan. Harglõ Saru mõisan panti Zirk Kavagu talun. Hingõlugõmistõ kirutõdi Zirg. Rõugõ Vana-Roosa mõisan Varstu Püsnikul panti Zirk nimes Lõokese Juhani pojalõ Jaanilõ. Haani mõisan saiva Plaani Tsirgu Jüri Piitre poja priinime Zirk. Vanan-Kasaritsan panti Mütä talun Mütt ja Zirk. Vahtsõliina mõisan sai nime Zirk suurõmb suguvõsa Pältri, Kundsa, Tsäpsi ja Saarta külän. Põlva kihlkunnan panti Zirk Mooste mõisan, Urvastõ kihlkunnan Urvastõ mõisa Tilsu talun, sääl kirutõdi hingelugõmistõ Zirck.
Võrumaa naabrusõn panti Tsirgu nimme viil mitu kõrda Sangastõ kihlkunnan (nellän mõisan), Otepääl (katõn mõisan) ja Võnnun (katõn mõisan). Võnnu Zirk tegüsi Ahja Valgõsuul ja Rasinal. Rasinal oll’ priinime alussõs hoobis lisanimi Tsirna (Zirna), minkast tetti hingelugõmistõ priinime Zirn, Zern ja Zirgk.
Üts huvitav Võnnu nimi om Sirge, kiränik Sirge Rudolfi suguvõsan. Tuu panti Perävalla täämbädses kadunu tõsõn välten Sirga (Sirga, Sirge) lisanime perrä. 18. aastasaal kirutõdi lisanimme ka Zirga ja Zirgo. Kallasmaa Marja om Perävalla lisanimme pidänü mehenime Sergei mugandusõs.
Nimme Sirk panti rohkõmb Tartu- ja Villändimaal. Näütüses Võrul elänü sõaväeläne ja koolijuhataja Sirgu Juhan oll’ peri Aru vallast Nõost. A vapsõ päämiis Sirgu Artur oll’ uma nime saanu hoobis Virumaalt Äntu mõisast.
Eestistämisel oll’ üts nimeparandus Sirg > Zirk ja kats muutmist Kristova(s) > Sirk Kolga-Jaanin. Nimest Zirk üteldi ka vallalõ. Asõmalõ võeti Kaldma, Loit, Saidla, Sillat ja Sirgoja.
Saarõ Evar
Rubriigin kõnõldas perekunnanimmi periolõmisõst ja tähendüsest.
