11. hainakuu pääväl peeti üle 60 aastaga Sarun Andrusõl jäl vanan magasiaidan pitu. Ait, miä sais Saru koolimaja ja Kolga sünnükotussõ vallamaja vaihõl, om innembi rahvamaja kah olnu, a 1960. aastist olõ-i tan midägi tettü.
Ütest külest om taa vana küläkeskusõ vahtsõnõ ellutuuminõ, a tõsõlt puult ka Mõttusidõ perre suurõ ettevõtmisõ täüdeminek. Uuri Mõttusõ Kadi ja Märteni käest, kuis magasiait vahtsõ elu sisse sai.
Kost tull’ mõtõ magasiait osta ja tuu esi kõrda tetä?
Kadi: Mahlakuun 2019 mu tõõnõpuul Märten, kiä esi om Saru külä poiss, tull’ kodu ja kõnõl’ mullõ, et tä käve siin ümbre müüre ja mõtõl’: seo om nii äge hoonõ, et võinu seo õks kõrda tetä. Ja tä esi om kõik aig sääne kullatsidõ kässiga ehitäjä olnu, et naksimigi lihtsäle otsast pääle. Ostimi maja är, teimi katusõ pääle ja sis edesi.
Märten: Saina paistuva inämb-vähämb hään kõrran, tuuperäst saigi ette võetus. Nüüd sis umbõs täpselt kuus aastat ildamba om asi valmis.
A mille plaaniga tetä seost avalik pidupaik?
Märten: Sääne mõtõ jah oll’, et kunagi nakkami tan midägi kõrraldama. Vahepääl oll’ külärahval jutt, et teemi puutüükua, a iks vist algusõst pääle oll’ sääne plaan.
Kadi: Minevä aasta suvõl kõrraldimi tan üte juubõli ja kuigi kõik viil valmis es olõ, inemiisile miildü ja säält tull’ viil julgust, et seo sobis häste pidupaigas ja tuu nimel tasus vaiva nätä.
Kuis tuu sis võimalikus sai?
Kadi: Roobi Katrin andsõ meile nõvvo, et tekkü mi MTÜ, et küssü tukõ. MTÜ nimes sai Rahvaait, selle et ütest külest om seo vana magasiait, a tan oll’ Saru külä rahvamaja kah, nii et nimi om sis naist katõst kokku pant. Meil om viis ammõtlikku liigõt, a viil hulga külärahvast om abin käünü talgul, näütüses maja ümbrelt kõrda tegemän. Kohaligu umaalgatusõ programmist Rõugõ vallast saimi rahha tsolgiviitorrõ pandmisõs ja üritüse kõrraldamisõs.
Mis plaani edesi omma?
Kadi: Põimukuun tulõ meil joba egäl nädälivahetusõl tan ettevõtminõ: opitarõ lillesäädmisest, rahvarõivist, jahist ja makrameest. Nii et plaanõ om hulga. Umakandi inemiisi huvi om suur ja hää sõnaga tugõjit om väega hulga.
* * *
Kultuuriõdagul kõnõl’ Paeglise Aili Saru külä kultuurielo aoluust, üles astsõva Mõnistõ rahvatandsurühm Hipp ja lauluansambli Mehkarid. Sai nätä Alle-Saija tiatritalu etendüst «Piibujutu» ja muusikat teivä kohaligu taustaga muusigu Kõiva Inda, Visla Enrik ja Käärmanni Reino. Programm oll’ tõtõstõ õkva nigu vanastõ, nostalgiahõngu andsõva edesi laululehe, väiku aoluunäütüs ja kaonu Saru raamadukogust perrä jäänü ja üles otsidu raamadu.
Saarõ Hipp
Mõttusõ Kadi ja Märten hindä kõrda tettü Saru magasiaidaga. Saarõ Hipõ pilt
