Pühäpäävä, 17. põimukuul peeti Karula kihlkunnan Ähijärve takan Plaagil maaha mõttõ- ja muusigarännäk etendüse «Lell» ratu pääl. Mälehtämisega köüdetüst aroti Kama Kaido, Luugi Lilli ja Õunapuu Lauri, mõtõluisi vaihõpääl laulõti Hainsoo Meelika ja Saarna Rolfi iistvidämisel laulõ, midä üts nuur naanõ oll’ aastil 1935–1945 umma laulik-päivikuhe kirja pandnu.

Mõttõpäiv, õigõmpa õdagupoolik oll’ neli tunni pikk ja tuust võtt’ ossa 60 inemise ümbre. Kõgõpäält saadi kokko inneskidse Plaagi talo moro pääl, kon mängiti seo suvõ alostusõn etendüse «Lell» edimäst jako. Edesi minti ütenkuun mõtsarata pite punkrilava mano, kon mängiti etendüse tõist puult. Punkri lae pääle olli pantu tooli kõnõlõjidõ jaos, juttu avit’ ohjõn hoita lavastaja Troll’a Agu.

Ettekandja kõnõli, midä tähendäs inemise jaos mälehtämine, kuimuudu mälehtüisi ütelt põlvkunnalt tõõsõlõ edesi antas vai ei anta ja mille om vaia rassõmbit aigõ kah mälehtä. Õunapuu Lauri tekk’ uman jutun vallalõ mälehtämise teoreetilist puult, kõnõl’ tollõst, midä omma mälehtämise-uurja kirja pandnu. Kama Kaido tõi uman jutun vällä, et timä põlvkunnalõ es anta valusit mälehtüisi edesi, niimuudu jäi mälehtämine katski ja vannu juhtumiisi tull’ naada kildakõisi viisi vahtsõst miilde tulõtama. Kiränik Luugi Lilli arot’, midä mälehtüse inemisega tegevä ja kuimuudu viil aastidõ takast kõnõlda asjust, miä siiämaalõ inemiisile vallu henge toova.

Juttõ vaihõl olnu muusigajago näüdäs’ aigõ muutumist läbi noorõ naasõ lauluvihu aastist 1935–1945. Ku alostusõn olli patriootligu laulu päämidselt noorõst Eesti Vabariigist ja vabahussõast, sis nõvvokogodõ võimu tulõkiga tull’ laulikulõ laul «Internatsionaal». Meeleolu muutu siski õigõ pia, patriootligõ laulõ asõmõlõ tulli vahtsõ võimu pilkamisõ laulu.

«Olõmi väega mõotatava. A ku tulõ pääle äkiline muutus, sis samast as’ast või mi arvaminõ tävveste vastapiditses minnä. Mu jaos om põnnõv teemä, kuis kõgõ seo põh’a pääl propaganda tüütäs,» kõnõl’ õdagu kõrraldaja, kunstnik Remmi Jane. «Ma ku lavastusõ kunstnik naksi kah mõtlõma, et mi tõtõstõ piät väega ette kaema, selle et mi ei taha kinkalõgi haigõt tetä. A om väega tähtsä, et mi kõnõlõmi aoluun olnuist keeroliidsist asjust ja mälehtüisist kah. Päiv and’ hulga mõttit, kuis tetä kõkkõ seod nii, et taa mõonu ja pututanu, a es olnu ütelpuult väega vallus ja tõsõlt puult meelelahutusõ muudu.»

Rahmani Elo

Märgotusõpäävä ülesastja etendüse «Lell» punkrilava pääl. Rahmani Elo pilt