Põimukuu om Lõvi tähtkujo korgaig, a ka kõiki tõisi, kiä olõ-i kaslasõ, pututas ja muut seo aig helksävämbäs. Nii nigu helksäse põimukuu kulladsõ viläpõllu. Aost hainakuu lõpust põimukuu keskpaigani kõnõldas ku Lõvi värehtiist, a seo kullanõ helküs mõos viil põimukuu lõpun kah. Seol aol om kimmäs süäme- ja luumisenergiä, miä kuts meid julgõlõ vällä näütämä umma peris olõmist. Lõvi värehti tegevä valla köüdüsse henge süvembä valgusõga ja toova võimalusõ laati hinnäst vahtsõ elojõvvu ja vaimoga. Om aig tähele panda kõkkõ, miä pand süäme laulma, ja laskõ minnä pelgüsel nättävüse iin.

Lõvi om kõgõ helksävämb, süämekeskne ja luumisjovvu tugõja sodiaagimärk. Päiv luu uman kodomärgin kimmä energiä hindä vällänäütämises, süämen elämises ja julgusõs naada käümä uma henge tiid. Seol aol nõsõs varrahummogu Siirius, kõgõ helksävämb täht, Päävä lähkül. Vanan Egiptusõn tähend’ taa aig Niilusõ suurõvii alostust, miä oll’ viläkandmisõ ja vahtsõstsündümise tunnismärk, a ka vaimlidsõ valgusõ tulõk. Siiriust kutsuti vaimlidsõs pääväs ja köüdeti korõmba tarkusõ, tervendüse ja tiidmiisiga.

Katsanda kuu nummõr katõssa om ilmotsatusõ tunnismärk, jõvvu, meisterlikkusõ ja tasakaalu nummõr. Väreht and märki tuust, et om kõgõ parõmb energiä hengeliidsi hüppide, heränemiisi ja vahtsidõ alostuisi jaos, keremb om vabas laskõ kõik vana ja tetä vallalõ tii vahtsõlõ.

Ma tunnõ kah esihindä seen ja ka kollõktiivsõt heränemise alostust, kon om hää tsihte ja unistuisi sõnno sisse säädi. Seo om suvinõ henge suurpido, täüs valgust, elojõudu ja luumist. Ma olõ õkva seo suvi tundnu esieränis kõvva süämega läbikäümise ja uma selge nägemise vällänäütämise tähtsüst, mink mano tulõ lämmi, pututaja ja inemisemuudu tunnõ. Om tunda läbimurdmiisi, vahtsõt vaimopuhahust ja mõttõviit, esieränis vahtsõnduisi läbi sõnno ja mõttidõ.

Egäüts meist võinu löüdä tegemise, mink tsihis om luvva tasakaalu, kuuntüüd ja harmooniat, ja tetä tuud, midä tä kõgõ parõmbalõ mõist. Tuust võitnu terve mi plannõt. Lõvi värehti ja kuldnõ aig luudusõn om kõgõ parõmb aig elo tähüstämises. Tuuperäst mass taast suvõst seenimaani mõnno tunda, kooni päiv viil lämmistäs ja saa kuun Lõviga Päävä külest Maa pääle paistuvidõ kiiri seen mängi.

Lumiste Kati

Kiränik Lumiste Kati and värskit mõttit,
kuimuudu egäpääväello vaeldust löüdä ja märgotas tuust, miä parasjago süäme pääl.