Üts tähtsä kultuuritegeläne tulõt’ mullõ seo kuu alostusõn miilde, et Uma Leht om no ilmunu 25 aastakka. Mullõ kül väega ei miildü egäsugumaidsi tähtpäivi pidämine, a säändse tähtpäävä andva põhjusõ kokkovõttid tetä.
Uma Leht om kül õnnõ neläleheküleline ja tulõ vällä egä katõ nädäli takast, tuuperäst või arvada, et taa om küländ väiku leht. A aoga jätt väiku kah kimmä jäle. Üten lehenumbrõn om ligi 34 000 tähemärgi jago toimõndõdut võrokeelist teksti. Tuu tähendäs, et tsipa veidemb ku 600 lehenumbrõn om avaldõt päält 20 miljoni tähemärgi jago võrokeelitsit juttõ. Seo olõ-i väiku nummõr ja või kimmäle üldä, et Uma Lehe osa kirjapantu võrokeelidse kultuuri luumisõl om küländ võimsa.
Pall’o õnnõ sis meile kõigilõ: inneskiidsile ja parhillatsilõ toimõndajilõ, autoriilõ-kiräsaatjilõ ja intervjuu andjilõ, ütenmärgotajilõ ja tsõõrikidõ numbridõ miildetulõtajilõ. A innekõkkõ iks suur teno lugõjilõ, kink jaos mi taad lehte teemi.
Rahmani Jan,
Uma Lehe päätoimõndaja
