Hää lugõja ja kirotaja! Kuulutami vällä timahavasügüsedse Uma Lehe jututalgo.
Ku teil om rahvalõ kõnõlda mõni põnnõv, lustilinõ vai hallus jutt, saatkõ tuu Umalõ Lehele! Talgoliidsilõ omma ette nättü tunniskirä ja väiku avvohinna. Vällä valitas parõmba talgotüü ja hulk häid juttõ trükütäs 2026. aastaga joosul lehen är. Innekõkkõ oodami kirätöid, miä passisõ lehe perämädse küle pääle, a saata või ka eloliidsi märgotuisi.
Talgojuttõ sordi:
1. Periselt elon juhtunu nal’alinõ vai tõsinõ lugu
Lugu, miä om olnu kas nal’alinõ, oppusõga, saatuslik vai muido ummamuudu. Võinu olla periselt sündünü.
2. Vaba heng
Seo teema all või saata näütüses suguvõsamälehtüisi mõtsavellist, a ka mälehtüisi aost, ku Eesti rahvas hinnäst vahtsõst priis laulsõ. Vai sis juttõ säändsist inemiisist, kiä hinnäst ilmangi ütegi raami sisse lasõ-i tsurmi.
3. Rändäjä õdagulaul
Teema om päälkirä saanu Ernst Enno luulõtusõ perrä ja oodami innekõkkõ juttõ, miä omma köüdedü reismisega. Nuu võiva olla reisikirä mõnõlt kavvõlt maalt vai mõnõst väikumbast rändämisest, kasvai jalotuskäügist uma sanna taadõ ja tagasi. Ja päält kavvõmban käümise om võimalik umin mõttin kah rännädä, tetä mõttõrännäkit. Nii et või laskõ uma mõttõ ja sulõ rändämä ja vet perän om nätä, miä lõpus vällä palas.
4. Väikut viisi põllupidäjä
Mi kultuurin paistus ollõv juurõ ala saanu vajahus aig-aolt näpo maa sisse pistä. Esiki sis, ku eestläse lätsi liina ja alõvihe elämä, kasvatõdi aiamaa pääl uma perre jaos köögivillä ja marju-puuvilju. Kortinamajju rõdu vai esiki aknõlavva pääl om iks tsipa rohilist kasvatõt, kas sis salatit ja tomatit vai esimuudu maiguhainu. Kõkkõ taad kokko või kutsu potipõllundusõs.
Miä pand umas tarbõs süüki kasvatama, kuis seo kultuur om levünenü ja kuis om seod põlvkundõ kaupa edesi antu, määndsit rõõmõ ja kannatuisi om potipõllundus üten toonu – kõik säändse esihindä vai tutvidõga köüdedü luu omma väärt kirjapandmist.
Teema om vällä paknu Eesti Rahvaluulõ Arhiiv.
Inne luu kirotamist lugõgõ läbi seo oppus:
Egä inemine või saata talgolõ kooni viis juttu. Jutt piät olõma kirotaja hindä luudu ja ei või olla inne mõnõn tõsõn lehen vai raamatun är trükit ega internetti üles pant. Lugu võinu olla mõistligu pikkusõga, mitte pikemb ku üts arvudilehekülg (3500 tähemärki, 700 sõnna). A või ka lühembä jutu kirota.
Egä jutu mano kirotagõ kimmähe uma nimi, aadrõs ja telehvoninummõr! Ku tahati, et lehen trükitäsi ti tõnõ (vällämõtõld) nimi, kirotagõ tuu suuv eräle luu lõppu.
Jutu saatmisõga and autor Umalõ Lehele õigusõ tuud lühendä, toimõnda, lehen ja internetin avalda.
Oodami juttõ nikani ku 21.11.2025. Jutu pallõmi saata e-kiräga info@umaleht.ee pääle vai postiga Uma Leht, Tarto 48, 65609 Võro liin. Tunnissõna: jututalgo.
Terävät sulgõ!
Uma Lehe toimõndus
