Võro instituudi iistvidämisel peetäs timahava kah märdikuu edimädsel täüsnädälil (3.–9.11) võro keele nädälit. Nädäli egäs pääväs om ette valmistõt määnegi võrokeeline ettevõtminõ, mink man saava huvilidsõ üten lüvvä.
Võro instituudi direktri Padari Ivari seletäs, et kuigi instituut edendäs nii vai naa aasta läbi võro kiilt ja kultuuri, sis võro keele nädälil nõstõtas keelega köüdetüt viil esieränis esile.
Timahavadsõ võro keele nädäli hõigulausõ om «Võro keelen om väke!». Päält instituudi kõrraldõduisi tegemiisi tulõ nädäli joosul umakeelitsit ettevõtmiisi muialgi, esieränis koolõn ja latsiaidun. Võro keele nädälit peetäs välänpuul Võromaad kah, näütüses Tarton Treffneri gümnaasiumin. Niisama saa harilikust inämb võro kiilt kuulda üleriigilidsen meediän.
A päält tuu või egä ettevõtõ, asotus ja inemine võro keele nädälit tähüstä. «Pankõ tüüle uma fantaasia ja mõtõ, midä põnõvat võinu võro keele nädälil uman keelen tetä!» kuts Padari Ivari üles ja lupa, et instituut saa häid mõttit nõvvoandmisõga tukõ.
Kae timahavadsõ võro keele nädäli tegemiisi: https://wi.ee/tuloman-om-voro-keele-natal-3/
UL
