Minevä nädäli lõpust om rahvastiguregistrin võimalik eesti imäkeelega inemiisil valli imäkeeles täpsemb paiklik kiil, näütüses võro kiil. Säändse muudatusõettepanõgi vei valitsusõ ette siseministri Taro Igor ja valitsus kitt’ tuu hääs.

«Ku ma siseministri ammõtilõ tulli, oll’ mul meeleh, et sääne jama om rahvastiguregistrih, et määnestki foiniikia ja vanapärsia ja klingoni kiilt saa imäkeeles valli, a võro, seto, mulgi ja muid mi piirkundliidsi kiili ei saa,» tulõtas Taro Igor miilde. Nii naas’ tä uurma, kuis iks saanu uma keele imäkeeles märkmist kõrralda, ja tull’ vällä, et tuu om võimalik, ku statistigaammõtin klassifikaator kõrda tetä.

«Rahvastiguregistri teedüsse täütmine ei olõ niisama, et egäüts kirotas, midä taht. Tuud teedüst piät saama massinaga lukõ ja noid vahetõdas kah registride vaihõl. Sääl piät uma kõrd olõma,» seletäs Taro.

Nii naksigi statistigaammõdi ja haridus- ja tiidüsministeeriümi inemise muutust vällä tüütämä. Tiidläisi ettepanõkil lepüti kokko, et imäkeeles saa märki 12 Eestin kõgõ inämb levinenüt paikkundlist kiilt: seto, võro, mulgi, tarto, saarõ, hiiu, muhu, kihnu, kodavere, kuusalu, lüganusõ ja jõhvi.

Edesi tull’ muuta vabariigi valitsusõ rahvastiguregistri määrüst. Taro Igor vei muudatusõ ettepanõgi valitsusõ istungilõ ja muudatus võetigi vasta. «Ma es piä pikki vaiõluisi pidämä. Veidükese küsti, et midä tuu üteh tuu, kas tuu käänd midägi pää pääle. Seleti, et tuu om lihtsäle inemise hindätiidmise määrämine ja om normaalõ asi,» kõnõlõs Taro.

Siseministri löüd, et uma paikkundligu keele märkmine imäkeeles om innekõkkõ tähtsä mi kandi rahva jaos. «Ma arva, et võrokõisi ja setodõ jaos tuu om suur asi, selle et meil om uma kiil alalõ ja hindätiidmist om kah tsipa inämb,» märgotas Taro Igor.

Päält tuu löüd tä, et uma kiil tekütäs pääliinan häätahtlist helevüst. «Ku näütsi seod muutust valitsusõ pressikonvõrentsil seto keeleh, sis tull’ hääd vastakostust ja mul om tunnõ, et tuu läts’ mõnõlõ inemisele süämele külh. Ja ku kunagi Riigikogoh vabal mikrofonil umma kiilt kõnõli, näütsi eski opositsioonisaadigu hääskitmist üles. Mu meelest uma kiil köüt kokko, mitte ei lüü eräle,» seletäs Taro Igor.

Rahmani Jan

Siseministri Taro Igor. Siseministeeriümi pilt

Kuimuudu umma imäkeelevalikut rahvastiguregistrin tetä:

 
1) Tulõ minnä kodolehe rahvastikuregister.ee pääle ja hinnäst ID-kaardi, Mobiil-ID, Smart-ID vai EU eID abiga sisse logida.
2) Kurapoolitsõst tulbast tulõ valli «Minu andmed» ja säält alt viil kõrd «Minu andmed».
3) Ette tulõ teedüs, kon allapoolõ keriden om kotus «Ütluspõhised andmed». Sääl om nupp «Muudan», mink pääle klõpsatõn tulõ muiõ hulgan ette imäkeele valik. Päält valigu tegemist tulõ vaota nuppi «Salvestan» ja omgi tettü.

UL