Mineväl nädälivaihtusõl peeti Võrol Kandlõ kultuurimajan korgõmbaiäliidsi festivaali. Seo oll’ joba kuvvõs kõrd, ku vanõmbit inemiisi kotost vällä tõisiga kokko saama kutsuti. Festivali kõrrald Võro pensionääre pääväkeskus.
Pääväkeskusõ juhataja ja festivali pääkõrraldaja Toomiku Siiri om rahul, et festival tõi maja ilostõ rahvast täüs. «Edimädsel pääväl pand’ hinnäst kirja 358 inemist. Peeti maakunna esitegijide kollõktiive kontsõrti ja tuu tõi üten hulga noid, kiä üles astsõva. A oll’ liinarahvast – noid kah, kiä niisama kaiva. Edimädse päävä tandsuõdagul oll’ edimädsest taktist pääle põrmand rahvast täüs,» seletäs Toomiku Siiri.
Tõsõl pääväl oll’ rahvast tsipa veidemb, a tuu oll’ ka tõsitsõmb päiv loenguga, kon kõnõldi vanõmbidõ inemiisi vaimlidsõst hääolõmisõst.
Periselt omgi vanõmbil inemiisil küländ rassõ hinnäst kotost vällä mõnõlõ üritüsele tulõma sundi. «Tuu pidi käümä iäga üten, et nakkat rohkõmb kahtlõma ja muutut kriitilidsembäs. Ja tervüs om iks väega tähtsä: ku tervüs om hää, sis inemine iks viil mõtlõs, et lätt kohegi ja tege midägi. A ku tervüs om kehvä, om inemisel ainumanõ murõ, et siist ja säält valutas. Ja om iks väega pall’o noid kah, kiä ütlese, et omma pall’o elon välän käünü ja ei jõvva inämb. Niisama om noid, kiä sundva hinnäst iks kotost vällä minemä ja sis perän omma väega rahul, et lätsi. Tuu om nigu spordiga: kõgõ rassõmb om sohva päält pistü saia, edesi om joba lihtsämb,» arotas Toomiku Siiri.
Tä tiid, et sääne kotost vällätulõk ja tõisiga kokkosaaminõ om iks väega tähtsä. «Nuu, kes käävä õnnõ perrega läbi, tundva hinnäst kehvembäle ja omma veidemb õnnõligu ku nuu, kellel om määnegi muu seltskund, kes omma uma eloiä joosul hindäle sutnu määndsegi padja- vai vardaklubi vai millegi muu kokko kor’ada. Vanõmban iän või inemisest saia ütsik ja kalõhunu, a või saia sääne, nigu meil tan om üts Silvi täämbä kah, kellel om kallendri täüs sündmüisi, kohe tä taht minnä ja midä kaia. Nuu, kiä ei taha ütsindä olla, löüdvä kimmäle võimaluisi kohegi minnä, kasvai tulla siiäsamma vanõmbidõ inemiisi festivalilõ,» kõnõlõs Toomik.
Timahavatsõl korgõmba iäga inemiisi festivalil sai kullõlda lõõdsamiihi Ojasaarõ Toomast ja Hoobi Helirit, kullõlda Vahtsõliina nuuribändi Krõps ja Kalkuna Mari kontsõrti, kaia esitegijide ülesastmiisi, kullõlda Tarto Ülikooli sotsiaaltervüshoiu profesri Sisaski Merikese loengut, nätä Krahvi tiatri etendüst ja kaia Teppo Augusti 150. sünnüaastapääväs kokko säetüt näütüst. Kandlõ maja fuajeen olli üles säedü mõnõ müügileti, kon pakuti õigõ mitmõ Võromaa talo söögi- ja joogikraami.
Rahmani Jan
Festivali pääkõrraldaja Toomiku Siiri üten tõõsõ pääväjuhi Udrasõ Ukuga püüne pääl. Rahmani Jani pilt
