Nigu aamõn kerkon tulõ 28. rehekuu päävä Lindora laadus vällä vahtsõnõ Võro-Seto tähtraamat. Timahavva om taa läbi tennü vahtsõndusõ ni vellerahva mulgi omma kah kampa võedu.

Nigu teedä, om tähtraamat esi üts kõrd aastan vällä antav aokiri, kost löüd mõtõluisi, uurmistöid ja loomingut, tuud kõkkõ seokõrd võro, seto ja mulgi keelen. Näide mano om pant teedüs tulõva aastaga rahvakallõndri tähtpäivist ja tagasikaehtusõ mineväaastaidsilõ umakultuuriga köüdetüile tegemisiisile.

Seokõrd saa raamatust lukõ uurmiisi Vana-Võromaa rahvaperätsest tandsokultuurist ja kirändüsest, a näütüses Seto mõtsavellist kah. Mitu nuurt inemist kõnõlõsõ pikembält umast löütüst ammõtist – tõisi hulgan saava sõnna kipõabitohtri ja spektroskoopiaga tegelejä füüsik.

Loomingurubriigist löüd Kuslapuu Kaisa ja Liiberi Robini luulõtuisi kõrvalt viil Lillaku Anti hirmujutu piiritagodsõ Petserimaa hämärist nukkõst ja Vaaba Janeku lühkü pildikese seonuka elost. Kildakõisi umast pääväraamatust mulgi läbielämiskeskusõ letinaasõn tuu lugõja ette Õitspuu Hella.

Tähtraamadu sääd’ kokko Brauni Mihkli ja pildi tsehkend’ Põlva juuriga Metsa Loona, kink animatsiooniperäne stiil pand vana luu vahtsõst elämä. Tähtraamatut saa edimält osta Lindora laadu päält ja päält tuud netipoodist umapuut.ee ja Võro instituudist. Välläandmist tugi Eesti Kultuurkapital ja Eesti Rahvakultuuri Keskus.

UL