Minevä pühäpäävä peeti Võrol Kreutzwaldi muusõumin Lauluesä mälehtüspäivä, kon anti kätte timahavanõ Kreutzwaldi mälehtüsmetäl ja stipendiüm.
Mälehtüsmedäli sai timahava tohtrõ Suija Rein, kiä om uurnu ja tähtsäs pidänü Kreutzwaldi ku tohtrõ tegemiisi. Medälisaaja pidi ka väiku ettekandõ tuust, määndse olli Kreutzwaldi tüütegemise olo ja põhimõttõ.
Kreutzwaldi stipendiüm andas Lauluesä testamendi perrä ütele noorõlõ inemisele, kiä om viil uma tii algusõn. Timahavanõ stipendiümisaaja oll’ Põlva gümnaasiumi opilanõ Häelme Ketlin, kiä om hää opitüün, a jõud kooli kõrvalt ka hulga muud är tetä.
UL
Timahavadsõ avvohinnasaaja Suija Rein ja Häelme Ketlin. Rahmani Jani pilt
