Seod nimme kand Eestin 45 inemist. Nime peritollu om Eesti perekunnanimeraamadu jaos uurnu Pussi Fred.
Tegemist om põlidsõ Virumaa nimega. Seo panti õnnõ üten mõisan, Jõhvi kihlkunna Kohtla mõisan 1835 kujul Käbbin. Nime saajidõ esäs-vanaesäs oll’ Käva (Kebba) Toomas ehk Uustalu Toomas (1742–1802). Tuudaigu kirutõdi Käva külä vai talurühmä nimme vahel b– ja vahel w-ga ja vast nii ka vällä üteldi: Käba ~ Käva. 19. aastagasaal toimu kotussõnimen harilik muutus, kon b-varjants kattõ är ja jäi õnnõ -v. 20. aastagasaa alostusõn oll’ Käva külä lähkün Käva kaivandus, parhilla om kõik tuu kant Kohtla-Järve liina osas saanu, küll om alalõ Käva bussipiätüs.
Priinime tegemises a-lõpuga lisanimest Käba panti sinnä otsa vinne keele naissuutunnussõga sõnnu nimelõpp -in: Käbba > Käbbin. Vinne mõost om sõski rassõ kõnõlda. Kohtla mõisan es panta üttegi ow-lõpuga priinimme, a näütüses Pagari mõisan panti 27 tükkü. Pussi Fred kirutas, et Uustalu Tuuma üte vele perrätulõja saiva priinime Mäggin ja tõsõ vele uma priinime Martin. Nuu olligi kõgõ Kohtla mõisa ainukõsõ in-lõpu. Või-olla, et tuu väiku seeriä tõugas käümä edenime-kujulinõ nimi Martin? Ütte Käva külä tallu kutsuti Mägi talu, priinimel Mägin om katõssa kandjat.
Käba (Kebba) nimega külä oll’ selgele olõman joba 1716. aastagal, sääl oll’ sõs kolm sama lisanimega peremiist, kinkast Kebba Nicolas (Käva Nigul) oll’ Käbini nime saajidõ edevanõmb. Varatsõmba aoluu asi om tsipa segäne, mainit om nimme Cobba ~ Kobba. 1420 om üten perändüsest loobumisõ ürikün mainit hainamaad seon paigan (ülembsaksa kiilde ümbre pantult mit dem Heuschlage in der Kepe). Mullõ paistus külh, et tuu Kepe olõ-i olnu õnnõ hainamaa, a asustõdu paiga vai vähämbält paikkunna nimi, mink perrä om nimmat hainamaad.
Pussi Fred om paknu, et innembi om Käba kotussõnime alussõs sõna kääbas ku sõna käba ‘paks puukuur vai tuust tett võrgukäba’. Tuuga tulõ nõun olla. Viil om tä paknu, et ku 1420. aasta hainamaanime alussõs om iks meile tiidmäldä asustõdu kotussõ nimi, sõs sobis tuu alussõs häste muinasskandinaavia inemisenimi Kebbe ~ Kebbo ~ Käbbo, miä tulõ germaani kutsmisnimest Gebo. Gebo alussõs om näütüses katõosalinõ germaani nimi Gebolf, kon edimäne osa om geba ‘and(am)’.
Gebolfist harilikumb germaani nimi om Gebhard. Käva kandi kõgõ vanõmbidõ külli nime omma joba Taani hindamisraamatun 1241, nigu Kukruse ja Kohtla Vanaküla vana nimi Odris. Võisi arvada, et säändse tütärkülä nigu Mõisamaa ja Käva olõ-i kah pall’u noorõmba ja omma tegünü keskaol. Nii et esihindäst või Gebolfi vai Gebhardi nimi Käba külä nime takan olla külh.
Saarõ Evar
Rubriigin kõnõldas perekunnanimmi periolõmisõst ja tähendüsest.
