No om seo õks sõit olnu! Ei tiiä, kuis teil, a mu jaos om seo pia läbi saaja 2025. aastak müüdä lännü nigu kipõtii pääl, kon kõik vuhisõs niimuudu müüdä, et ei olõ aigu kohegi sissegi käändä. Om olnu hulga tegemiisi, toimõndamist, tõlkmist. Om tulnu tähistä egäsugumaidsi tähtpäivi ja kokko trehvädä uutmalda ja oodõtuisi juhtumiisiga.
12. jõulukuu pääväl (12.12) kell 12.12 panni arvudi kinni ja otsusti, et inämb ma seo päiv tüüd ei tii. Lätsi sõpru poolõ sanna, midä nä olli riididsel pääväl otsustanu küttä. Ku edimält olli kutsmisõ pääle ütelnü, et ei olõ aigu, sis no sai äkki selges, et aigu tulõ võtta. Muido põrutat viil tävve huuga vasta saina.
Iin om pühhiaig. Ka tuu aig tüküs inämbüisi maru kipõ olõma: om vaia egäle poolõ jõuda ja kõik tegemädä tüü ja toimõndamisõ viil är tetä. Siski tasus vahepääl hindäle miilde tulõta, et kõiki ilmaasju är aia nigunii ei jõvva ja kõik ilma tüü saa-i nigunii ilmangi tettüs. Ja vähembält üts sannankäük sõpru ja umatsidõ seltsin mahus kimmäle viil seo aastaga sisse är. Tege pää klaaris ja and jõudu vahtsit tsihte säädi.
Rahmani Jan,
Uma Lehe päätoimõndaja
