Mõni aig tagasi käve üte sündmüse peräst Brüsselin. Ku pidulidsõ as’a saiva läbi, tekkü mõni tunn aigu liina pääl jaluta ja ümbre kaia. Trehvsi ütte muusõumisaali, kon näüdäti uulidsakunstnik Banksy töid. Nuu tüü umma väega mõtlõmapandja ja üts pilt, mis minnu esieränis um mõtlõma pandnu, um sääne, kon Jeesus Kristus ripus risti pääl, a timä kässi külge umma köüdedü kingipaki.
Muiduki vei tuu pilt mõttõ täämbädse ao jõulukombidõ pääle. Kos iks um tettü turundus: üts miis, kes pall’o aastit tagasi ummi põhimõttidõ ja välläütlemiisi iist sai väega karmi karistusõ, lüüdi risti, ja mi no piämi timä sündümise avvus suurt pidupäivä ja ehimi timä kujjo tulli ja pakkõga. Ja teemi toda pikkä aigu: käve märdikuu keskpaigan Stockholmin ja olkõ pääle, et jõuluni oll’ päält kuu ao, liin oll’ kõik jõulutulli ja jõuluturgu täüs.
Ei usu, et mi vanarahvas jõuluaigu niimuudu um pidänü. Innembi paistus, et seo pümme aig um olnu rohkõmb vaikusõ aig, ku istutas kotun vai kävväs tüül, a kaias rohkõmb hindä sisse kah. Seo um perrega kokkosaamisõ ja aasta kokkovõtmisõ aig. Rahu aig.
Ka jõuluao suur tung kerikulõ paistus küländ andsak. Ku terve aasta joosul käävä inemise hääl juhul kõrra vai kats kerikun, sis jõuluõdagu umma kerigu rahvast nii täüs, et inemise ei mahu sisse är. Kost sis äkki tulõ sääne suur pühä tunnõ sisse? Saanu jo aasta seen pall’o rohkõmb kerikun kävvü ja jõuluaigu minnä õnnõ kalmuaida, panda sääl kündle umatsilõ ja mõtõlda mi hulgast lännü inemiisi pääle. Et kes nimä olliva, kuis ellivä ja kes nä meile olliva.
Nii ma mõtlõgi, et mi ei piä kõgõ seo jõulu-ull’usõga üten minemä. Periselt jo oodami vahtsõt valgust, miä pümehüse är võit. Tuu sünnüs jõulu ümbre ja sis um jäl luutust, et päävä nakkasõ valgõmbas minemä, pääle nakkas vahtsõnõ aasta, midä saa tävve rõnnaga ellä. Inne jõulu mass kor’ada hindä ja umatsidõga kuun jõudu pia tulõvas vahtsõs aastas, et sis tetä edesi noid asju, miä seo aasta tegemädä jäivä.
Pindmaa Aigar
Ettevõtja Pindmaa Aigar märgotas tan ilmaasju pääle tsipa tõsõ nuka alt, ku hariligult kaema harinu oltas.
