Ligembil päivil saa valmis ansambli Kõhukesed CD-plaat «Keele pääl», kon saa võrokeelitside laulõ ja muusiga vaihõlõ kullõlda Rahmani Jani luulõtuisi ja juttõ.
Plaadimatõrjal võeti üles minevä aasta imäkeelepäävä aigu kontsõrdil Ihamaru külämajan. Et ansambli avvostaja omma joba pikembät aigu küsünü helükandjat, midä saanu koton vai auton plaadimassinalõ tsusada, antigi kontsõrtsalvõstus vällä plaadi pääl.
Ansambli Kõhukesed mäng kuun joba kümnendät aastakka, näide firmamärk om kõnõlda muusiga vaihõlõ nal’ajuttõ ja juhtumiisi elost hindäst. Suurõlt jaolt Põlva kandiga köüdedü ansambli liikmõ ütlese, et omma peri Vanalt Võromaalt ja näide süämeas’as om võrokeelitside ja -meelitside laulõ kirotaminõ ja ettekandminõ. Ansamblin mängvä Kaha Kaido (mandoliin), Mängli Aksel (viiol), Ojasaarõ Toomas (Teppo lõõts) ja Saarõ Ivari (basskitarr). Perämäidsil aastil om ansambli päält hindä luudu mängnü Pulga Jaani ja Rahmani Jani laulõ, sõnno omma ansambli jaos kirotanu viil Lehestiku Andres, Antoni Annika, Contra ja tõõsõki.
Umma vahtsõt plaati näütäs ansambli Kõhukesed iispäävä, 23. radokuu pääväl kell 19 Põlvan restoranin La Storia.
UL
Kõhukesed. Meistri Eleryni pilt.
