17. radokuul seol aastal nakkas Hiina kallendri perrä pääle verevä yang-hobõsõ aasta. Meil omma sis vastla kah.
Verevä hobõsõ aasta oll’ viimäte 60 aastat tagasi, tuu alas’ 21. vahtsõaastakuul 1966. Pall’ogi või olla üttemuudu, a muidogi mitte kõik, selle et päävä energiä, mis aasta sisse juhatasõ, omma erinevä. Võrrõlda iks saavat.
Ma käve tuul aastal keskkooli viimätseh klassih. Peräh vahtsõ aasta koolivaheaigu olliva tuulidsõ ja külmä ilma. Tuus aos, ku pidivä tulõma keskkooli erialaeksämi, vahtsõaastakuu lõpu poolõ (mul raamadupidäjä ja kaubandusõ eriala), sai ma läädsä (leetri). Tõsõ teivä eksämit, ma sällülde sängüh. A tulõhopõn traavsõ tsõõri – oll’ –25 ümbre külmä. Külmä oll’ peris pikält ja ma kotoh kah pikält. Eksämi es jää tegemädä – koskil keväjä poolõ sai nuu tettüs.
Üts esieräline asi juhtu tuul aastal viil. Päivikut ma sis es piä, a miilde om jäänü Vinnemaa ja Kuuba värk. Piaaigu olõs tuukõrd sõda vallalõ päsnü. Ameeriga and’ perrä. Ei mälehtä, kas oll’ tego rakette vai baasõ luumisõga Kuubalõ.
Nüüd om sõda Ukraina ja Vinne vaihõl. Kas üts and perrä vai mis sünnüs seon tulõhobõsõ mängon? Hopõn tuu muutuisi, a kuis? Kas Trump and perrä ja Ukraina antas Vinnele?
