Vana-Võromaa Käsitüü MTÜ plaan sügüsest valla tetä rahvarõivakooli, kon saa katõ aasta joosul valmis meisterdä üte naisi vai miihi rahvarõivakomplekti, pääkattõst kooni tsuugõni vällä. Opiao seen andas muidoki hulgan tiidmiisi rahvarõividõ kandmisõ kotsilõ ja egäsugutsit näpotüünõksõ.
Rahvarõivakooli iistvõtja Oja Vilve ütel’, et huvilidsõ tahetas joba radokuu joosul kirja saia. Sis om aigu oppajidõ-meistridega läbi kõnõlda ja tugõjit otsi. Rühmän piäs olõma 20 inemise ümbre, sis tulõ kooliraha mõistligu suurusõga.
Katõaastadsõn koolin om kolm jako. Kõgõpäält saias kokko veebin ja kõnõldas alospõh’ast: Vana-Võromaa rõividõ uma nägo esi kihlkundõn, kandmisõga köüdedü kombõ, pruugidu matõrjali ja tüüriista. Tetäs ka selges, kuis uma komplekt kokko säädi. Edesi käüdäs muusõummõn ja opitas tüünõksõ. Oppaja-meistri om plaanin löüdä Vanalt Võromaalt ja siist lähküst. Viimätsen jaon saias kokko Vana-Võromaa Käsitüü esindüspoodi koolitustarõn Võrol, et joba vällälõikamisõ ja umblõmisõ mano jõuda. Kooli lõpõtajal omma ette näüdädä nii rahvarõivakomplekt ku kirälik uurmistüü noidõ rõividõ kotsilõ.
Määndsitki tiidmiisi ja mõistmist rahvarõivakooli opma tulõja käest ei oodõta. «Ärke peläke! Kõiki tüünõksõ opimi kotusõpääl,» julgust Oja Vilve. Ka matõrjali peräst ei piä pääd murdma. Kõkkõ kaias kuun, ütine ostminõ-telmine või odavamp kah tulla. Saman ei olõ keelet võtta üten mõni rõivas, näütüses vanaimä käest saad, ku sääne joba olõman om.
Varramba on rahvarõivakuul olnu Eesti Rahva Muusõumi man ja viil mõnõl puul Eestin. Osalidsõ omma saanu tetä hindäle meeleperälidse kihlkunna rõivit. Seokõrdsõl koolitusõl tetäs õnnõ Vana-Võromaa rahvarõivit: komplekt piät olõma valit ütest Vana-Võromaa kihlkunnast.
Ku kuul iks käümä lätt, sis tulõ lõpõtusõs rõividõ pidolinõ vällänäütämine kah.
«Seo om võimsa tunnõ, ku sääne suur tüü valmis saa,» tiid Oja Vilve. Tä om tennü hindäle kats komplekti ja telmise pääle viil nii lähküle ku ka kavvõmbalõ. Ilosa rõiva, uma näpotüü tege kimmäle rõõmu, a viil suurõmbas kasus pidä ta tarkuisi ja mõistmist, midä kuul and. Rahvarõividõ tegijit on veidü. Või tävveste olla, et kooli läbi tennü inemine astki rahvarõivameistride sekkä.
Rahvarõivakooli iistvõtja Oja Vilve. Männe Tiina pilt
