Eesti Rahvusringhäälingu muusigatoimõndaja valõ aasta muusikus 2020 Võromaal elävä ja toimõndava KALKUNA MARI. No vastas Mari Uma Lehe küsümüisile.
Kuimuudu sa lännü aasta pääle kaet. Kas sait tetä tuud, miä tahtsõt, vai midägi veidemb vai midägi inämb?
Ma püvvä võtta ello, nigu tä parla om. Hindäperi muusigu elon om nigunii küländ pall’o tiidmäldä asjo. Luumisvõim om sjoo, miä minno sõs vällä avitas.
Hää miil om tuust, et saie pall’o koton perega ja luudusõn olla. Hää miil om, et saie sõrmõ mulda pistä ja esi hindäle süüki kasvata. Tollõstsamast aian istmisest kasvi ka «Õunaaia albumi» vällä. Nii hää miil olõ-i, et hulk tüüd linnas’ vasta taivast (reisi, vällämaasuhtõ ja üleilmakäümise). A tõsõlt puult jälki om hää miil, et inemise lindsi veidemb müüdä ilma ja imäkene maa sai vaest veso henge tõmmada.
No «Õunaaia album» tõie mullõ pall’o tüüd ja pall’o illo kah – sjoo oll’ häste eräline projekt, plaadi teie esi ummi kässiga ja telli saie kah õnnõ õkva mu käest. Nii pall’o vastakostust ja tukõ ku taalõ tsõõrilõ ma olõ-i vast kunagi tundnu: huuandja ja inemise Inglüsmaalt, Vinnemaalt ja Ameerigamaalt kirotiva, tahtsõva telli.
Midä tunnustus su jaos tähendäs? Kas tuu om õnnõ midägi hääd vai pand ka määnestki vastutust kaala?
No ma olõ õks eestläne ja võrokõnõ ja selle ma esi ei mõista väega uhkõs minnä tunnustusõ pääle – tii iks taad, midä tii, aja umma asja. A õks om vastutus tuuga üten: piä pall’o sõnna võtma ja häste läbi mõtlõma, midä mul üldä om. Sõnal om vägi seen ja selle tulõ õks kaia, midä kõnõlõt. Kae, laul, miä Kristiina Ehiniga keväjä kirotimi – «Hädaabikõne peaministrile» – rahvustiidüisi ja Eesti Rahvaluulõ Arhiivi tugõmisõs, and’ tulõmit: tiidüsele antigi 1% är ja ERA om vast ka kõgõ hullõmbast edeotsa är päsenü. Sõs mõtlõ, et tasus õks uma mõttõ vällä üldä ja kaitsa noid tähtsit asjo, miä omma kaitsmist väärt.
Midä oodat 2021. aastagalt?
Ooda ütte põnõvat aastakka! Taa tulõ päämidselt vahtsõ uma plaadi luumõtüü tähe all, a suvõ poolõ saa vast jälki rohkõmb kontsõrtõ kah anda ja aasta lõpus om joba paar vällämaa-kutsõt. A pääle tollõ tulõ Inglüsmaa plaadifirma alt keväjä vällä kuuntüü islandlaisiga ja taha vällä saia ka jaapanlaisiga kuuntüüplaadi (tuu ilmus Jaapanin ja Eestin mu uma Aigu Om Records alt). Njoo omma mõlõmba mu jaos hoobis tõistmuudu piirest üle as’a, nii et kullõjilõ vaest veso üllätüst kah. Ku häste lätt, sõs saati sjood jaapanlaisiga muusikat suvitsõl Võromaal Viitinän kullõlda, selle et ma plaani neo Jaapani muusigu siiä tuvva! Ütele Setomaal lavastuvalõ tiatritüküle kirota muusikat.
Ahjaa, ja Munamäe tornin tetäs pia vallalõ helü- ja valgusinstallatsioon, kon om mu luudu muusiga.
Küsse Rahmani Jan
Aasta muusikus 2020 valit Kalkuna Mari. Rahumaru Ruudu pilt
