2020. aasta Võromaa Kultuuripärli tiitli sai kunstnik KUUSINGU TOOMAS. Üts preemiä saamisõ põhjõndus oll’, et timä graafikan, maalõn ja illustratsioonõn om nätä Lõuna-Eestile umast perimüst, huumorit ja mütoloogiat.
Kas sa olõt parhilla uman loomingulidsõn korgvormin?
Ma ei usu. A ma ei tiiä, kas olõ viie aasta peräst rohkõmb vai vähämb vormih. Ku ma nüüd olõs korgvormih, sis tuust olõs väega kah’o. Looda, et korgvorm viil tulõ.
Kas kunstnik saa parõmbalõ tüüd tetä Võro liinan vai näütüses Pariisin vai Tal’nan?
Tüüd saa egäl puul tetä, kõgõ parõmb om tetä sääl, koh sul om hää olla. Pariis om meil vast pää seeh sääne romantilinõ kunstnigõ Meka. A mille pidänü tuu olõma paik, koh sünnüs illos ja hää?
Kunstnikkõ, kunstiello ja läbikäümist om suurih paigoh muidoki rohkõmb ku tah. A ku mi kõnõlõmi tüütegemisest, sis tah om lihtsämb. Näütüses Tal’nah, ku sa tahat kruvvi osta vai passipilti tetä, lätt puul päivä tuujaos. Egäpäävä olmõas’a omma väikoh paigah viie vai kümne minoti takah, nii jääs tüü jaos rohkõmb aigu.
Mullõ miildüs ütsindä tüüd tetä, ma väega sääne kambaga kõrraldaja ei olõ.
Mis om elo mõtõ?
Kost ma tuud tiiä. A mille jõgi vuulas?
Küsse Rahmani Jan
