Katõtõistkümnele tähemärgile kuulutas laelambi abiga vahtsõs aastas tüü-, raha-, armastusõ- ja ilmaõnnõ Eesti kõgõ veidemb tunnõt tähetark Kaldmani Hedi (44).
 

Oinas 21.03.–20.04.

 
Tüü. Häid mõttit jakkus terves aastas. Kae sõs, et noidõ pääle liiga huugu ei lää ja hinnäst lambas ei tüütä.
Raha. Kõva tüü tuu vegan-lambaliha lavva pääle.
Armastus. Armastus tulõ, kos tä päses. A õnnõ sõs, ku sa periselt kah inemiisiga kõnõlõt, mitte õnnõ meeme ei saada.
Ilm. Lummõ satas kõik aig. Ku jõulu tulõva, saat hindäle mõtsast tuvva ilosa sotsiaaldemokraatligu jõulupuu.
 

Pull 21.04.–20.05.

 
Tüü. Lövvät tüüd ku pistüjalapulli tegijä. A tuud mitte õkva, kõgõpäält piät koroonat veidembäs jäämä, a kül jääs.
Raha. Otsi ulli, kes ei pelgäs pulli, ku om pullil raha mekk suun! Tuud hääd mekki saat terve aasta läbi tunda, ku õnnõ tüüd viisit tetä. A ülearvo kah ei massa, muido piät sullõ koolnu pulli toetust masma nakkama.
Armastus. Pull tulõ pikä ilo pääle. Armastus kah.
Ilm. Ilma ilmalda vast kah ei saa. Lämmi ja hää tulõ tuu..
 

Katsiku 21.05.–21.06.

 
Tüü. Olõt tubli tüütegijä ja kõik pandva tuud järgmädsel aastagal tähele. Saat tüü iist mitmit avvohindu.
Raha. Seo om õnn ja armastus.
Armastus. Pluuto kolmnukk kindlustas sullõ kinä traditsioonilidsõ abielo ja kristligu jõulupuu.
Ilm. Pikne, päiv, suvi ja kinä ilma.
 

Vähk 22.06.–22.07.

 
Tüü. Üte kivi all ei massa vähäl liiga kavva kükädä. Lövvät vahtsõ ja parõmba tüü mõnõ sillembä ja suurõmba kivi alt.
Raha. Saat valitsusõ käest katusõrahha. Kae sõs, et iks sirgõlõ saas ja vett ka pidä.
Armastus. Veenusõ ja Marsi kuusnuka mõo tuu sullõ säändse armuõnnõ, määnest sa viil innemb nännü ei olõ. Hoia alt!
Ilm. Pikne, päiv, süküs ja talvõkülmä.
 

Lõvi 23.07.–22.08.

 
Tüü. Tüüga om nigu om, a tuu-iist om aasta nall’a ja naaru täüs.
Raha. Sul tulõ OnlyFans tetä, muud ei jää üle.
Armastus. Kuigi mõtlit joba hindäl jalgu lühembäs saagi, lövvät lõpus parralõ pikä seldsilidse.
Ilm. Pikne, päiv, kevväi nii lämmi ja illos.
 

Neitsü 23.08.–22.09.

 
Tüü. Tüüd olõ-õi vaia tetä, nõvva kodanikupalka.
Raha. Tsukruimä hoolitsõs su iist, raha peräst är murõhtagu.
Armastus. Tüüd sa ei tii, a armastus press iks egäst nukast sisse.
Ilm. Pikne, päiv kõrraga kuun omma su seen.
 

Kaalu 23.09.–23.10.

 
Tüü. Saat eläjäaia direktris, a kae ette – ijäkahr Rasputin taht su otsussit mõotama naada.
Raha. Ku sa ütski kõrd kaalu pääle ei astu, ei piä sa ka MyFitnessi arvit masma.
Armastus. Vastusõ lövvät hindä sisekosmosõst.
Ilm. Muidu om hää ja lämmi, a su sünnüpääväl tormasõ ringi tolmusaatana.
 

Skorpion 24.10.–22.11.

 
Tüü. Koroona peräst jääs tüü är.
Raha. A palka mastas iks edesi. Mis nii viga ellä!
Armastus. Armastus olõ-õi piljard. Mulku ei saa. Pulkõ ja pallõga om veidü rohkõmb luutust.
Ilm. Naabrimiis tegi vahtsõs aastagas pall’o küttepuid valmis, järeligult tulõ külm ilm.
 

Vibumiis 23.11.–21.12.

 
Tüü. Eesti Laululõ sa es saa, a sinno uut iin viil magusamb karjäärivõimalus – nii ütles Uraani ruut läbi laelambi.
Raha. Varastat rikkilt ja jaotat vaesilõ.
Armastus. Vladislav.
Ilm. Munamäe kotsilõ langõs esierälinõ kaabu kujoga pilv.
 

Kivikits 22.12.–20.01.

 
Tüü. Sinno valitas sügüse presidendis.
Raha. Schrödingeri raha. Om ja ei olõ kah.
Armastus. Armastust tulõ nii pall’o, ku hindä sisse jõvvat lupa.
Ilm. Ilmataadi näpukas pand taivast egäst hullu kraami alla sadama: kunnõ, ubinit, kassõ, neli tankisti, pini jne.
 

Viikaldaja 21.01.–19.02.

 
Tüü. Läät pensionilõ, pall’o õnnõ!
Raha. Võtat sambast kõik pensiraha vällä ja elät nigu kuninga kass!
Armastus. Olõ-õi olõman maski, miä võis kavva käkki armastust sääl, kon tä om, ja teeseldä tuud sääl, kon olõ-õi.
Ilm. Taivast satas miihi, hallõluuja!
 

Kala 20.02.–20.03.

 
Tüü. Tüükotussit – näid tulõ viil, satas alla, näid tulõ viil, peris miljoniid.
Raha. Är külmät palk sulatõdas jäl valla ja kõik lätt parõmbas.
Armastus. Saat lühkü lavva taadõ.
Ilm. Lambipirnil läts’ hõõgniit katski. Päivä ei näe terve aasta otsa. A tuu-iist om egä üüse taivan illos verrev kuu.

Reimanni Hildegardi tsehkendüse