Uma Pido kõrraldaja kuulutasõ jäl vällä võrokeelitside koorilaulõ ja -säädide konkursi, et saia vahtsõt võrokeelist koorilauluvarra.
«Vahtsõnõ võrokeeline koorimuusiga and huugu koorilaulutraditsiooni jakkumisõs,» luut konkursi kõrraldamisõ vidäjä Tigasõ Merike. «Vana-Võromaa koori laulva kõgõ rõõmuga võrokeelitsel laulupidol ja sinnä sõpruskunda taht iks mano tulla kuurõ üle Eesti ja kavvõmbast kah. Võrokeelidse koorimuusiga näütämises om päält Uma Pido viil võimaluisi, tuuperäst omma konkursilõ oodõdu laulu, miä pasva ette kanda mitmõsugumaidsin esitüspaigun.»
Laulõ oodõtas kõiki kooriliike jaos, nuu võiva olla nii saatõlda ku pillisaatõga laulu. Oodõtas võrokeelitsit võistlustöid, nuu võiva olla hariligu koorilaulu, a niisama lustligult krutskilidsõ ja mängolidsõ laulu. Kõrraldaja ei säe piire teema vai þanri pääle, a oodõdu ei olõ muiõst keelist ümbre pantu laulu.
Konkursilõ saadõtuid töid kaes hindamiskogo. Konkursi avvohinnafond om 3000 eurot, preemia andas vällä 2021. aastaga märdikuul.
Laulõ esitämise tähtaig om seo aasta 1. põimukuu (1.08.2021). Tüü tulõ saata e-postiga merike.tigas@wi.ee vai postiga Võro Seltsi VKKF aadrõssilõ Tartu 48, 65609 Võro.
Säänest koorilaulukonkurssi kõrraldõdas joba neländät kõrda. Konkursilõ saadõdu tüü andva võrokeelidse laulu- ja rahvapido Uma Pido kõrraldajilõ mano valikuvõimaluisi. Konkurss ei anna kõkkõ pido laulukavva, a varatsõmpilt konkurssõlt (2009, 2011, 2014) om pidolõ jõudnu 16 laulu.
Kuvvõs Uma Pido peetäs ületulõva aasta 3. piimäkuul (3.06.2023).
Konkursi statuuti ja täpsempät teedüst saa lukõ internetist kodolehe umapido.ee päält.
UL
