Kuigi paistus, et suvi om kõikvõimalikkõ festivalõ täüs, plaanitas näid manogi tetä. Üts sääne vahtsõnõ kand nimme «Aigu om!». Tuu om hainakuu lõpupäivis vällä märknü tunnõt muusik Kalkuna Mari.
««Aigu om!» om muusika ja sõna sündmüs. Kotus, kon muusika ja sõna saava kokko. Taa om kogokunna ja külä ettevõtminõ, kost võtt ossa nii kotusõpäälitsit talente ku maailmategijit, seokõrd üte vällämaa esinejäni vällä,» kõnõlõs Kalkuna Mari umast ettevõtmisõst.
Mõtõ kõrralda säänest rahulikku festivalli, kon näütüses ka mol’otamist kitetäs, om Mari pään olnu joba paar aastakka. «Kuigi iks süüdäs seen, et piät taad kultuuriello tan edesi viimä. Eks taa mõtõ om kasunu vällä Viitinä kõrtsi kontsõrtõst, midä ma olõ joba mitu aastat suvildõ kõrraldanu. Tull’ mõtõ, et olnu vahva tetä siistkandi rahvaga midägi kuun. Ütte omma võtõtu seo nuka tegijä: Rõugõ kunstikuur, RMK Pähni külästüskeskus.»
Mari löüd seo võromaidsõ aigu-om-filosoofia takast ka hindä jaos tähtsämbä ja suurõmba mõttõ. «Taha inemiisi härgütä aigladsõmba ja parõmba-pikembä elo poolõ,» seletäs muusik.
Edimädse «Aigu om!» festivali kavan omma opitarõ, kontsõrdi, käügi, jutu, näütemäng. Edimädse päävä kontsõrdil astva üles Kalkuna Mari, Mikita Valdur ja Ameerigamaa klarnetimängjä Rothenbergi David, kiä om ka doktorikraadiga uurja ja kirätsura, kirotanu tsirkõ ja mutukidõ elost ja tennü ümbre ilma tsirkõ, sitikidõ ja vaaluga ütenkuun muusikat. Küländ tähtsä osa om kavan ka mõtsajuttõl, midä kõnõldas ja kaias päämidselt Pähnil. Poolõs tunnis herätedäs ello ka Viitinä mõisaprovva von Krüdener, kiä kõnõlõs umast elost. Tulõ ka mol’otamisõ opitarõ, midä vidä Üü-ülikooli miis Tootseni Jaan. Täpsempä kavva saa kaia kodolehe aiguom.ee päält.
A kuis Maril om aigu säänest festivali kõrralda? «Olõki-i aigu,» naard Mari. «A aigu tulõ võtta ja ku tahtminõ om, sis löüd kah.» Festivalilõ uut tä kõiki paigaperimüse- ja kultuurihuviliidsi. «Opitarri programmin on küländ pall’o tegemist latsilõ, nii et latsõ omma kõgõ oodõdu, õdaguprogramm passis näile kah. Ooda nii paigapäälist rahvast ku Võromaa suvõküläliidsi,» ütles Kalkuna Mari.
Mari suuv, et timä kõrraldõt festival tulnu, nigu nimigi ütles, sääne rahulik. «Noid asju ei plaanita tetä väega suurõlt, ku küünükontsõrt vällä arvada. Taha, et inemise saanu mõnusalõ kokko tulla, aigu võtta. Tulla varrampa paiga pääle ja rahulidsõ meelega võimalikult pall’o programmist ossa võtta,» seletäs festivali ellokutsja Kalkuna Mari.
Rahmani Jan
Festivali õdagudsõl kontsõrdil ülesastja Kalkuna Mari ja Mikita Valdur. Rahumaru Ruudu pilt
