9.–12. süküskuul peetäs üle Eesti muinsuskaitsõpäivi. Tima­hava om noidõ päivi teema «Käkküssin perändüs». Tuu teemaga tahetas nõsta üles paiklikku ja võiolla edimädsel päälekaemisõl harilikku, a kogo­kunna jaos tähtsät ja hindätiidmist tugõvat perändüst.

Egäl paigal ja kogokunnal om uma lugu ja egäl puul lövvüs kultuuriperändüst, mink üle uhkust tundas. Mõnikõrd tulõ tuu õnnõ käküssist vällä pästä ja laskõ jutussil hiilada. Niimuudu omma kõrraldaja ütelnü timahavvatsidõ muinsuskaitsõpäivi kotsilõ.

Muinsuskaitsõpäivi peetäs kõrra aastan ja noidõga tutvus­tõdas mi ümbre olõvat rikast kultuuriperändüst. Taa nädälivaihtus omma vallalõ maja ja mälehtämisepaiga, tetäs ekskursioonõ ja tüütarri ja proovitas tutvas tetä ja mõtõsta kodo­kandi kultuuriperändüst ja aoluku. Kõiki sündmüisi vidävä paigapäälidse inemise.

Võro liinan Kreutzwaldi muusõumin tulõ muinsuskaitsõ­päivil üts esieräline ettevõtminõ. Muusõumi juhataja Hollo Aimi näütäs huviliidsilõ Laulu­esä elomaja tarõ pääle viidüid asjo, midä om peetü umal aol veidemb väärt olõvis. Sääl om aastakümnit var’ol olnu müüblit ja kunsti, mink man ei olõ seletävät teksti ja mink mano hariligult muusõumiküläliidsi ei lasta. Kõigil nail neläl pääväl kell 12 saava huvilidsõ kaia ja kullõlda, midä sinnä tarõ pääle är käkitü om.

UL

Kreutzwaldi elomaja tarõpääline, kohe om aastakümnide joosul viid egäsugumast kraami. Seo nädälivaihtus saava huvilidsõ nailõ asjolõ pilgu pääle visada. Sepä Marika pilt