Põimukuu võro keele iistkõnõlõja Õkva Margit kutsõ inemiisi üles märgotama, määne võrokeelidse kumoga sõna võisi välla vaihta sõna «retsept», midä tarvitõdas pia egäh keeleh üttemuudu. Välla pakuti kümme sõnna: mekioppus, opahus, oppus, nakatus, sumpus, sahvtenplöks, ressep, tekküs, sehkendus, tetäs nii. Inämbältjaolt oll’ man ka seletüs, mille õkva säänest sõnna pakutas.
Iistkõnõlõja ettepanõkil valiti välla sõna «tekküs». Määndsel kujol – üte vai katõ k-ga – tuu sõna piäs võro keelen kotusõ löüdmä, jäägu keeleas’atundjidõ otsusta. Sõna pakja om Tambets-Telgi Helen, kiä saa avvohinnas keedüssit iistkõnõlõja varasalvõst. Avvohinna saa kätte Võro instituudist (Tarto uulits 48).
Iistkõnõlõja Õkva Margit ütel’ Umalõ Lehele, et taa kuu aigu säänest avvonimme kanda tõi tedä hinnäst võro keelele pall’o ligembäle. «Ma pandsõ tähele, et mu mõttõ olliva kah võrokiilse. Ja peris pall’o tull’ seletä, mis taa iistkõnõlõja ammõt om ja mille tedä peetäs.»
UL
