Radokuu 23. pääväl peeti Põlva küle all Peril Eesti Vabariigi 105. aastapäävä, Peri külä Põlvamaa aasta küläs saamisõ ja sanna-aasta avvus pito.

Rahvast oll’ õkva niipall’o, et kõik mahtuva laudu taadõ lahedahe istma. Süüdi, juudi, sis raamadukogo juhataja Õkva Margit lugi viktoriiniküsümüse ette ja laudkunna pidivä är vastama. Suurõmb jago küsümüisi olli vanast aost ja pall’o, kes ildamba Perile elämä tulnu, es mõista noid är arvada.

Ildamba selet’ Margit pikält Peri aoluust ja saimi kõik hulga targõmbas. Tä andsõ ka teedüst, et seo keväjä saa Peri raamadukogo 100aastadsõs ja kõnõl’ 2019. aastagal luudu küläseldsi tegemiisist.

Külävanõmb Lutsari Innar suuvsõ lillipottõga õnnõ katõlõ seldsi liikmõst sünnüpäävälatsõlõ. Sünnülatsi tervit’ ilosa lauluhelüga ka kotusõpääline duo Margit ja Signe.

Muusikat tekk’ ansambli IRENA & Ivar Hansen. Muusigapallo vaihõpääl küsse Õkva Margit küläseldsi «rahandusministre» Tammiste Karli käest, kuis tä löüdse Eesti tõsõst otsast tii Perile, kon ehitäs hindäle koto. Karl om mitmit häid projekte kirotanu ja noidõ täüdeviimises om ka rahha saad. Täl om andi nigu vanastõ hääl kratil, kes käve täüskuu aigu kesküüse risttii pääl kullõman, kostpuult rahapaa kõlinat om kuulda.

Ansambli mängse ekä sorti muusikat, oll’ nii aiglast valssi ku kipõmbat rokki. Kõik saiva iso täüs tandsi.

Urmi Aili

Õkva Margit intervjuiir sannalava pääl küläseldsi «rahandusministret» Tammiste Karli.