Võro instituudin mängiti urbõkuun opilaisilõ mõtõldut võro keele ja kultuuri mälomängo. Edimädse kotussõ vei kodo Haani kooli 8. klassi opilasõ Vodi Õnnõlõim, Rõõmusoksa Liisbet ja Rüütli Hugo.
Seo oll’ instituudil kolmas kõrd Vana-Võromaa kuulõ 8. klassi opilaisi mälomängolõ kutsu. Timahava võti kutsõ vasta kuus võistkunda viiest koolist. Mälomänge peetäs parhillatsõl aol pia egän keskusõn ja neo omma popi. Arvada tuuperäst, et seo om hää viis tiidmiisi mano saia ja mõos meelele kah häste: ku vastust ei tiiä, saat vastutust jaka, ja ku tiiät, om jaet rõõm viil suurõmb.
Vodi Õnnõlõim ja Rõõmusoksa Liisbet mälomängo võitja-tiimist ütli, et näide jaos olli küländ lihtsä neo küsümüse, miä käve keele ja kultuuri kotsilõ. Mõlõmba tütrigu koton kõnõldas võro kiilt. Mano om tulnu keele- ja kultuuritiidmiisi koolist, kon noorõmbin klassõn oll’ kõrra nädälin võro keele tunn, ja ka lihtsäle ilma ja inemiisiga kokko puttõn. Ku küssü, mille poolõst võro kiil esieräline om, sis om näil keeletiidlik vastus kah õkva võtta: väega pall’o tarvitõdas täpitähti ja sõna lõpun om tihtsäle kakkõhelü.
Õnnõlõimu ja Liisbeti meelest tege paigapäälidse keele mõistminõ kodokotussõga lähkümbäs. Seo om esihindäst tarvilinõ teedüs noidõ jaos, kiä omma võtnu tsihis, et elo Võromaal piät alalõ jäämä.
Rohkõmb päämurdmist oll’ Õnnõlõimu ja Liisbeti jaos küsümüisi man, minka taheti teedä mõnõ kotussõ kotsilõ Vanal Võromaal. Üts rassõmbit oll’ näide ja kõigi tõisi nuuri mälomängjide jaos näütüses pildi-küsümüs, miä käve Uma Pidoga köüdedü laululava kotsilõ Indsikurmun.
Võimaluisi Vana-Võromaa, võro keele ja kultuuri teemal tiidmiisi pruuvi löüd huvilinõ ka Võro instituudi kodolehe päält jaost «Viktoriini».
Kabuna Kaile
Timahavadsõ võro keele ja kultuuri mälomängo võitja-tiim: Vodi Õnnõlõim, Rõõmusoksa Liisbet ja Rüütli Hugo. Simmi Silleriini pilt
Parõmba Vana-Võromaa, võro keele ja kultuuri tundja
1. kotus – Vodi Õnnõlõim, Rõõmusoksa Liisbet, Rüütli Hugo (Haani kuul)
2. kotus – Allasõ Laur, Janno Karl-Markus, Toomsalu Robert Maximilian (Võro Kreutzwaldi kuul)
3. kotus – Serva Kadi, Pruuli Liisa, Saarõ Hindrik (Osola põhikuul)
