Võro liinan Kandlõ majan peetäs mahlakuu 22. pääväl kellä 10–17 edimäst võrokõisi kongressi. Kongressi kokkokutsmisõ päämine iistvidäjä om kiränik Kauksi Ülle.

Mille kongress kokko kutsutas?

Võrokõisi kongress kutsutas kokko, et üten arota, kuis parõmbahe hoita umma põlist kiilt, kultuuriperändüst ja elokeskkunda. Et võrokõsõ saasi kõgõ taa üle esi otsusta.

Kiä või kongressile tulla?

Kongressile või tulla saadikus egä inemine, kiä esi tund, et tä om võrokõnõ ja kiä om saanu viie inemise helü. Hää olnu, ku saadikidõ siän olnu umavalitsuisi ja asotuisi juhtõ, külävanõmbit, ettevõtjit, oppajit ja luujit – võimaligult mitmõsugumaidsi inemiisi.

Midä kongressil tetäs?

Võrokõisi kongressil nõstami üles Võromaa elo, luudusõ, võro keele ja kultuuriperändüse küsümüse. Nailõ küsümüisile otsitas vastussit ja peetäs plaanõ, kuis panda hinnäst seenitsest inämb masma ku Vana-Võromaa põlinõ rahvas ja tetä nii, et meid parõmbahe kuulda olnu.

Minkas piät olõma valmis kongressi saadik?

Saadik piät olõma valmis kongressi plaanõ arotama, naidõ puult vai vasta umma hellü andma ja ka edespite naidõ küsümüisi pääle märkmä vai midägi naidõ lahendamisõ hääs tegemä. Saadigu valiva hindä siäst võrokõisi kongressi vanõmbidõ kogo, kiä sais võrokõisi ütitside huvvõ kaitsmisõ iist kooni järgmädse kongressini.

Kas taa võrokõisi kongress om iks õigõ asi?

Eesti om vaba ja demokraatlik maa, kon om tävveste loomulik ja säädüslik, et inemise arotasõ esi uma maa ja elo küsümüisi ni võtva aktiivsõhe ossa naidõ üle otsustamisõst. Võro asi om ka Eesti asi. Sääntsen vaban, demokraatligun ni võro- ja eestimiilsen vaimon peetäski võrokõisi kongressi.

Kas taast kongressist määnestki kassu kah om?

Kongressist om kimmähe kassu, selle et ku mi, võrokõsõ, esi uma maa, rahva ja keele pääle ei mõtlõ ja taa iist ei saisa, sis kiäki tõõnõ ei tii tuud ammuki. Nigu vanasõnagi ütles: kiä keväjä künd ja külb, tuu saa sügüse vai midägigi, a kiä ei künnä, ei külvä, tuu ei saa mitte midägi.

Läte: vorokongress.ee