Vana-Võromaa latsõ omma oodõdu 18. lehekuul (18.05) kell 11 Sännä kultuurimõisahe Jaigi Juhani avvus võrokiilsit juttõ kõnõlama.

Jutupäävä mõtõ om meelen pitä Sännä mõisan sündünüt Võromaa kiränikku Juhan Jaiki (1899–1948), kink loomingun lövvüs pall’o rahvalist jutujüvvä. Ku Juhan oll’ ütesä-aastanõ, nakas’ tä esä 1908. aastagal luuma Möldreoja tallo Luhamõtsa küllä, midä põra ähvärdäs Nursipalo sõaväelidse har’otusvälä laendusõ ala jäämine.

Võrokiilsele jutupääväle omma oodõdu Vana-Võromaa latsiaidu ja kuulõ latsõ. Egä osalinõ kõnõlas üte võrokiilse jutu, ette või kanda ka hindä luudut. Kõgõ parõmba jutukõnõlõja valisõ vällä kullõja, kiä saava umalõ lemmikulõ helü anda. Täpsempä saa kõgõ kotsilõ lukõ Võro instituudi kodolehe päält. Jutupääväle kirja pandmisõ perämäne aig om 12. lehekuu päiv 2023.

Sännä külä ja taa lähkü kant om kultuurilidsõlt rikas kotus. Om jo Sännäst peri ka võro kirändüse klassik Artur Adson (1889–1977), kink avvus siiäni 20 kõrda olnut võrokiilset luulõlugõmisvõistlust peetäs jutupääväga ütstõõsõ ala.

Jutupäävä kõrraldas Võro instituut kuuntüün MTÜga Sännä Kultuurimõis. Pääväle omma oodõdu kõik huvilidsõ. Jutupäävä alostusõn saa nätä-kullõlda ka Papa Kreutzwaldi Õueteatri näütlejide ülesastmist.

UL