Joba päält kuu ao sais Põlvan Edu keskusõ parkla man uulidsa veeren muudsa söögikapp. Tuu om kapp, kohe saa perräjäänüt söögikraami viiä ja kost egäüts saa tuud hindä tarbõs võtta. Kappi hoit käügin MTÜ Põlvamaa Tsõõrimajandus, kon säidse naist priitahtligult söögikraami pästvä.
«Mi tegemiisi mõtõ om söögikraami tsõõrimajandus. Et söögikraami, miä kongi perrä jääs, es visatu är, a tuud saanu inemise tarvita. Ku ka sis midägi perrä jääs, saanu tuu eläjile, näütüses kannulõ vai lambilõ. Ja ku sis jääs viil midägi perrä, sis tuugi tulõ luudusõlõ tagasi anda, mullas tetä,» seletäs Põlvamaa tsõõrimajandusõ üts iistvidäjä Mesaku Merlin.
Ilmakimmäs ja külmäkapiga söögikapp, miä saa osa vaiamineväst elektrist pääväpatarei abiga, avitas tsõõrimajandusõ priitahtligõl söögikraami pästä. «Seo ei olõ meil sotsiaalprojekt, a om keskkunnaprojekt. Sotsiaalprojekt om tuu, et noil, kinkal api vaia, söödetäs kõtu täüs. Mi püvvämi hoita söögi väärtüst, et tuud es pantu prügü sisse,» kõnõlas tsõõrimajandusõ tõõnõ iistvidäjä Kolga Anu.
Inemine, kiä kapist söögikraami võtt, ei piä kannatama majandusligun puudusõn. Väega tihtsäle läävä koolilatsõ trenni minnen kapist müüdä ja omma väega rõõmsa, ku saava midägi suuhtõ tsusada, kõnõlõs Mesaku Merlin. Tä ütles viil mano, et mõnõ omma kaivanu, et omma kapist mitu kõrda müüdä käünü, a kapp om tühi olnu. «Mi puult kaiõn om tuu väega hää, selle et mi ei piä midägi är viskama ja är kraamma, a näemi, et seo süük om lännü tsõõri pääle. Seo omgi mi tsõõrimajandusõ mõtõ, et süük löüdnü tarvitaja. Tarvitaja saisukotussõst ma saa muidoki arvo, et seo või veidükese kurvas tetä. A mi soovitami mitte perrä jättä ja õks kapi mano kaia, kimmäle naaratas õnn kunagi kõigilõ,» löüd Mesaku Merlin.
Tuujaos, et söögikraam kappi jõudnu, tegevä priitahtligu söögipästjä ummi egäpäävätsit tsõõrõ. Süüki jääs perrä päämidselt söögikotussil ja söögipuutõl. Parhilla om poodikett Coop tuu kotus, kost perräjäänüt söögikraami pästetäs, a tsõõrimajandusõ naasõ uutva üten lüümä ka tõisi Põlva söögipuutõ. «Meil käü tuu niimuudu, et poodi ei piä esi seod kappi täütmä. Mi priitahtligu käävä kokko kõnõldul kelläaol ja toova söögi är, nii et poodilõ mi kuurmat ei anna,» seletäs Kolga Anu.
Edimäne kuu aigu söögikapiga majandamist ja hääd vastakostust om andnu priitahtlikõlõ huugu mano. Egä päiv vahetõdas teedüst ja hoitas helevüst üllen. Edesi plaanitas tugõjidõ ja vallavalitsusõ abiga vällä säädi tõõnõ söögikapp tõõsõn Põlva veeren. Viil om plaanin söögikapi lähküle panda kompostri. Põlva kunstikooli latsi abiga tahetas söögikapp, et tuu parõmbalõ silmä jäänü, kirivämbäs kah värvi.
Rahmani Jan
Põlva söögipästjä: Purga Birgit, Kallastu Kanni, Kolga Anu, Niinemäe Merlin, Mesaku Merlin, Lattu Kristiina ja Irbo Kerli. Silmä Sandri pilt
