Ivan oll’, ausalõ üldä, vastik tüüp. Kedägi tä es kullõ, kõik saatsõ pikält. Tälle miildü viin, kakõlus, võõra naasõ jne.
Löüti, et perämine võimalus om – võtta Ivan vasta NLKP liikmõs ja sis timä pääle rõhuda kõgõ partei tohutu autoriteediga.
Ja tull’gi lõpus päiv, kon Ivan saisõ kõigi ummi pattõga parteibüroo iin. Küsümüse naksiva kõgõ vähämbäst: mille sa parteimaja trepist alla kusit? Seltsimehe kaabu sai likõs!
Ivan lubasi kõik viguri maha jättä. Ka viina, kakõlusõ, võõra naasõ. Lõpus küsse tõnõ sekretär: a kas sa partei iist elu kah annat?
Tuu pand’ Ivani tsipa mõtlõma. Tä rehkend’ midägi näppe pääl ja ütel’ sis, esi üleni higine: sitta kah, võtkõ sis taa elu kah, mis tuugi inämb väärt om ilma viina, naisi ja kõgõ muulda, mille ma teile joba är lubasi.
Milles siinkotsil seo vana juudi muinasjutt? (Juudel oll’ laagritõn aigu asju vällä mõtõlda). Tulõtagõ miilde, ku meid nakati lääne poolõ ümbre säädistämä. Midä kõnõl’ sis Marju Lauristin? Läänel om Eestit vaia Vinnemaaga suhtlõmises, nimä esi ei tunnõ vinläse mõttõviisi. Nüüd tulõ vällä, et kõgõ olulisemp jutt om jäänü kõnõlõmada. Iinkõnõld jutust tulõ vällä, et vinläne rehkendäs surmaga väega ja pidä tollõst variandist luku (kui muu ei avita).
Mis põrõlt sünnüs? Kõik rüükvä ütel meelel: Vinnemaa tulõ kahuriidega ümbre piirada, küll tä sis uma koobaldi är and. A vinläne või mõtõlda nigu tuu Ivan: ku laia lehte inämb mängi ei saa, sis ei olõki elul mõtõt. Tulku tuu surm sis kasvai tuumapommi läbi. Ja sis kõlbas tuu laul, et «kats armastajat matõti ütte hauda mõlõmba».
Minevä nädäli kaivõti midägi Varstu ühishaudu man. Ma jõudsõ umal aol kõnõlda Varstu surnumatjiidega. Tulõ vällä, et ainukõnõ kolmõpäävätsen lahingun langõnu sakslanõ aeti hauda koon ummi vainlaisiga. Laiba olli nädälipäävä maan vedelnü, surnumatja tahtsõva kah värsket õhku. Ülemuisi kõrraldus sakslanõ kavvõmbalõ mõtsa ala matta jäeti täütmäldä.
Sõda oll’ peaaigu läbi, tuud unõlmiide positsiooni Ritsikä oja veeren oll’ mõttõtu rünnädä. Üte inemise rumala käsu peräst jäie vähämbält sada naist ilmaaigu meesteldä.
Pulga Jaan
