22. mahlakuul peeti Võrol edimäst võrokõisi kongressi. Kongressilõ oll’ tulnu 139 saadikut, kel olli üten võetu 2023 inemise volikirä.
Kongress tekk’ kolm otsust: kuulut’ võrokõsõ põlisrahvas, kinnüt’ võro keele õigusõ haridusõn, meediän, kultuurin ja avalikun pruukmisõn ni võrokõisi õigusõ uma keskkunna hoitmisõn. Kõiki otsussit ja muud teedüst kongressi kotsilõ saa lukõ kodolehe vorokongress.ee päält.
Võrokõisi kongressi saadigu valisi hindä hulgast 11 liikmõga vanõmbidõ kogo. Sinnä kandidiirsõ 19 inemist. Egäl saadikul oll’ vanõmbidõ kogo valimisõl kolm hellü.
Vanõmbidõ kokko valiti: Kauksi Ülle (48 hellü), Kuuba Rainer (48 hellü), Saarõ Hipp (45 hellü), Kuklasõ Mati (37 hellü), Jüvä Sullõv (37 hellü), Luisu Kertu (30 hellü), Allasõ Anti (23 hellü), Niidumaa Maarika (21 hellü), Raitari Inga (20 hellü), Variku Jüri (16 hellü), Sänna Karl-Richard (11 hellü).
Vanõmbidõ kogo valisi hindä hulgast päävanõmbas Kauksi Ülle ja asõ-päävanõmbas Kuuba Raineri.
UL
Kongressi saadigu ja külälise Kandlõ kultuurimaja kontsõrdisaalin. Rahmani Jani pilt
