17. lehekuul kell 18 oodõtas uma keele ja kultuuri sõpru ja jutupajatajit Lasva järve viirde, kon peetäs jutupajatamisõ õdagut. Ummi parõmbit juttõ omma lubanu sääl kõnõlda Korneli Viiu, Raudkatsi Ene, Plumanni Kaja-Riina, Uguri Kadri, Jansonsi Silvi, Kambergi Kersti ja Toomiku Siiri. Vallalõ om ka vaba mikrofon, nii et egäüts, kel mõni hää umakeeline jutukõnõ kõnõlda, saa tuud tetä.
Juttõ mano saa kullõlda ansamblit Koidu Tähed, karmoškatütrikku Leima Evelini ja perimüsmuusikut Kambergi Kerstit.
Jutuõdak om osa Eesti rahvakultuuri keskusõ jutukõnõlõmisõ festivalist Ööbikuööd, midä peetäs 16.–21. lehekuul mitmõn paigan üle Eesti. Teedüst saa Käbina Helena käest aadrõsi helena.kabin@rahvakultuur.ee päält.
UL
