21. mahlakuul kell 7.45 oll’ Kuldri latsiaia man vahtsõ muaköögi vallategemise pido. Latsõvanõmbidõ ja tugõjidõ abiga sai valmis kotus, kon latsõ saava rahuligult muaga mängi. Esierälidses tege Kuldri muaköögi üte latsõvanõmba, kunstnik Navitrolla sainakujondus.
Minevä sügüse otsustõdi plaan selgele esitlüste kokko säädi ja tuud näüdäti esäpääväl latsõvanõmbilõ. Esä võti mõttõst kinni, panni pää kokko ja naksi toimõndama.
«Saimi kokku nii matõrjali ku tugõja. Otsõva vallavanõmb, hoolõkogo esimiis, tull’ latsiaia tüütäjil hindäl tugõmisleheküle pääl küsümine täütä. Seo oll’ üts suur kuuntüü ja hulga latsõvanõmbit panni uma ola alla,» kõnõlõs Absaloni Kristina.
Kokko saadi vahtsõlõ latsi muaköögile hulga tugõjit. Nuu olli latsõvanõmb Palmi Aigar, OÜ Soosing (ehituskaup24.ee), OÜ Sän&Män, UPM Otepää, Würth, Nõiariik ja Liiklusliin, OÜ Fenstor ja MTÜ Azusa häätegemispuut.
Köögi ehitämist võtsõ iist Antsla vallavanõmb Kirsbaumi Avo, kiä om esi ka Kuldri latsiaia latsõvanõmb. Tedä tugõsi hoolõkogo esimiis Elveti Rait. Nii tulli 15. mahlakuul latsiaia mano kokko viil tõõsõki esä: Raigi Riivo, Piigli Aiken, Kasaku Ako, Mensi Kalle, Kannela Allan ja Trolla Heiki. Ütenkuun ehitedi tuu päiv küük üles, selle et valmistusõ, matõrjaali immutaminõ ja muu sääne, oll’ tuus aos är tettü.
Nätäl ildampa oll’ muaköögi pidolinõ vallategemine. Õkva päält lindilõikamist joosi latsõ vahtsõhe küüki mängmä. «Edimädsel pääväl, ku latsõ vällä sai, oll’ larm kolm kõrda väikumb ku hariligult. Õnnõ toimõndõdi ja tuu käü siiämaani: edimäne asi om latsil kõrraga minek muaküüki ja õkva sääl toimõndama,» seletäs Absalon. «Latsõ omma kõgõ parõmba peegeldäjä, nä omma väega õnnõligu. Ja oppaja ausalõ üteldä kah. Om üts kotus, kon saa laskõ latsil luvva, kon nä saava tetä nii, nigu nimä tahtva. Ei piä kõik aig näid kiildmä ja piirdma. Nä saava tävveste esi luvva ummi süüke ja kõkkõ, midä vällä mõtlõsõ.»
Säändsit muaküüke, kon latsõ rahuligult plätserdä saava, om muialgi latsiaidun. Ja nii mõnõngi paigan omma latsõvanõmba tuu ütenkuun esi ka üles ehitänü. A Kuldri uma tege esierälidses tuu, et köögisaina om maalnu kuulsa kunstnik Navitrolla, kiä om esi kah Kuldri latsiaia latsõvanõmb. Vallategemise aigu kõnõl’ tä, et pidä latsi muaga mängmist väega tähtsäs, selle et tuu om suurõs abis näide luuvusõ kasvatamisõ man. Uman väikun sõnavõtun läts’ tä kogoni nii filosoofilidsõs, et nõstsõ mua kõgõ tähtsämbäs as’as tan ilman. «Muast olõmi kõik võetu ja muas ka ütskõrd saami,» löüdse Navitrolla.
Rahmani Jan
Latsõ omma tormanu suurõ rõõmuga vahtsõlõ muaküüki mängmä. Rahmani Jani pilt
Latsõvanõmba muaköögi pidolidsõl vallategemisel, edeplaanin vallavanõmb Kirsbaumi Avo. Rahmani Jani pilt
