Seod nimme kand Eestin 360 inemist. Viil omma tarvitusõl ka vanan kiräviien nimekuju Lorits ja Loritz vähätse arvu kandjidõga.
Hingelugõmiisi perrä panti seod nimme katsan mõisan: Tähtvere ja Luke (Nõo), Kärde (Laiusõ), Võisiku (Kolga-Jaani), Harjumaa Kurna mõisa ja Virumaa Aa mõisa ni Vaivara pastoraat.
Võrumaa kotus oll’ Krabi mõisa, siin panti Loritz ütest Lambri talust peri perrile. Näide esä-vanaesä oll’ kirän ku Lorenz. Ka Rõugõ kerigu personaalraamatin oll’ kirän Lambri peremiis Lorenz ja priinime varjants kujul Lorenzson ’Loorentsi poig’. Keriklikult muutu Krabilt peri nimi kujulõ Loorits viil XIX aastasaa tõsõn poolõn, nimi om iks häste levinü Krabi, Mõnistõ ja Vahtsõ-Roosa kandin.
Ku Krabil pässi masma hingelugõmisõ nimekuju, sõs Holstre mõisan Mulgimaal (Paistu khk) juhtu õkva vastapidine asi. Saarelooritse talun panti sääl hingelugõmiisi perrä Lauritz, a keriklikult nakas’ olõma Loorits. Rahvaluulõtiidläne Looridsõ Oskar om säält suguvõsast. Niisamatõ om säält peri Räpinä Looritsidõ haru nimi. Näide edevanõmb Juhan Kääriku poig om juba 1854 Räpinäl abiellunu, ollõn niimuudu üts edimäidsi mulke, kiä Räpinä kanti vällä rännäs’.
Om võimalik, et ka mõnõn muun paigan omma nimekuju Laurits, Lorenz ja Loorits vaheldunu ja nimi Loorits perines viil mõnõst paigast pääle näide ütse mõisa. Nime alussõs om meelega mõista edenimi ja toolõ umakõrda pühämehe nimi Laurentius. Romaani kiilin om kõgõ hariligumb nimekuju Lorenzo, põh’amaie kiilin omma päämidse la-algulidsõ nimekuju nigu Laurits, Lars ja Lasse. Meid kõgõ rohkõmb mõotanu saksa keeleruumin om egäsugust nimealgust, tuuperäst om ka meil hulga varjantsõ nii la- ku lo-ga. Alguperäne nimi Laurentius oll’ vanan Rooman rohkõmb nigu lisanimi: niimuudu võidi kutsu egätütte, kiä oll’ peri Laurentumi maakunnast. Pühä Laurentius oll’ varajadsõ keriku varahoitja Rooma liinan, kiä ai uma vangivõtja nii vihatsõs, et tä hukati elusast pääst är küdsämisega. Tuu ollõv olnu 10. põimukuul aastagal 258, selle om täämbä timä mälehtüspäiv. Lauridsapäiv, või üteldä ka looridsapäiv.
Saarõ Evar
Rubriigin kõnõldas perekunnanimmi periolõmisõst ja tähendüsest.
