Võro instituudi saalin (Tarto 48, Võro liin) om vallalõ tettü šarþinäütüs võro keele iistkõnõlõjist. Nal’alidsõ portreepildi om joonistanu kunstnik Lume Kristjan, kiä omgi pühendünü šarþõ tsehkendämisele.
Kunstnik esi ütles, et pruuv ummi pilte pääl vällä tuvva portreteeritävä sisemädse olõmisõ. Šarþi vorm and ette ka tuu, et portreteeritävit näüdätäs tsipa kõvõrast piiglist. «Näütüses, ku mõnõl om suurõmb nõna, tetäs tuu šarþi pääl viil suurõmbas,» seletäs Lume Kristjan, kiä om ummi töie jaos huugu saanu uma iidoli Hiibusõ Hugo piltest ja oppusõst.
Näütüsepilte pääl om kujotõt 18 võro keele iistkõnõlõjat. Lume Kristjan ütles, et tsehkend’ noid fotodõ perrä ja om esi ummi piltega rahul. «Kõgõ lihtsämb oll’ tetä Contrat ja Padari Ivarit, naid ma joba tundsõ. Tõisi oll’ rassõmb tetä, mõnt pilti pidi ümbregi tegemä,» kõnõlõs kunstnik umast luumisõprotsessist.
Aastaga lõpuni valla olõvat näütüst saava huvilidsõ tüüpäivilde nätä Võro instituudin.
UL
Võro keele iistkõnõlõja ammõtit pidänü Säinasti Ene üten kunstnigu Lume Kristjaniga näütüsesaina man. Rahmani Jani pilt
