Võro keele nädälil kõrrald’ Võro vallaraamadukogo võro keele päävä. Kõgõpäält tulliva Kauksi Ülle ja Riitsaarõ Evariga kokko saama Parksepä keskkooli viiendä ja kuvvõnda klassi latsõ ja näide oppaja.
Aeti tõsist juttu kirändüsest, raamatist, märdipääväst ja võro keelest. Ülle ja Evari perreansambli Baba ja Ka saatõl laulti ja lüüdi tandsu kah. Ülle soovit’ latsil iks oppi ja kõnõlda võro kiilt ni alalõ hoita vanaimmi ja vanaessi mälehtüisi.
Päävä tõsõl kokkosaamisõl olli kullõjis Parksepä inemise ja hulk raamadukogohoitjit. Pärlijõõ veeren Saarlasõ külän üles kasunu Kauksi Ülle juttõ olõski võinu kullõma jäiä. Suur teno Üllele ja Evarilõ tulõmast!
Üritüst toeti Eesti Kultuurkapital ja Võro vald. Tennämi Võro instituuti hää nõvvu ja võrokiilside raamatidõ iist ni loodami hääd kuuntüüd edespite kah.
Kraani Marika
Kraani Marika pilt
