18. joulukuust kooni tulõva aasta 31. vahtsõaastakuuni om Võromaa keskraamadukogo kolimisõ aos kinni. Raamadukogo lätt tagasi umma majja Jüri uulits 54, kon om vahepääl tettü remont.
«Koliminõ om rassõ tüü. Panõmi raamadu kastõ sisse ja hää abilisõ veevä nuu tagasi kodomajja, kon raamadukogotüütäjä nuu riiolidõ pääle pandva. Kaitsõliit tulõ appi riioliid majja viimä. Vallalõ tulõ pakki ka hoiukotussin olõva raamadu, muuta saisu teedüskogon jne,» seletäs raamadukogo juhataja Kuljusõ Inga.
Remondi aol saiva raamadukogo ruumi vahtsõ aknõ ja aknõlavva, radiaatori ja müübli.
Lainutõduid raamatit saa kinniolõmisõ aol tuvva tagasiandmisõ kasti. Nuu, kel om vaia vahepääl raamatit lainuta, saava tuud tetä tõisist maakunna rahvaraamadukogodõst.
UL
